متهم دلوقتي فى قضيه تخابر لصالح اسرائيل بقصد الاضرار بمصلحه مصر ..

انا لسه سامع عنه النهارده الصبح من نبيل فاروق عالتليفزيون الارضي

البرنامج كان كله فكسنه وجه بعديه علطول كارتون اطفال اسمه السنونو ..

استكمالا لبرامج بضان التليفزيون الارضي المعتاده

المهم الموضوع شدني لان كلام نبيل فاروق عنه مدخلش دماغي ببصله

اولا كان بيتكلم عن مرحله الكمون اللى قعدها الجاسوس (حسب تعبيره) وهيا تلات سنين

وامتلاكه لاجهزه بتتيح ليه الاتصال بالاقمار الصناعيه .. احه يعني

اولاً بس .. توجيه التهمه بواسطه المخابرات لا يعني انه جاسوس

ممكن جدا يكون كبش فدا متقدم للرأي العام ولغايه ما يصدر حكم محكمه

فهو بريء .. وحتى حكم المحكمه العسكريه عليه مليون الف تحفظ فى الفتره دي !

لان الادله المقدمه لا تعني بالتاكيد انه جاسوس .. يعني ايه ؟

يعني لو عندي كوبايه ده مش معناه اني بشرب خمره !! << (انا بشرب من الازازه علطول)

ازاي .. حسب المقالات اللى قريتها انه تم التحفظ على اجهزه معاه وهيا

لابتوب وكمبيوتر وفلاشات “حديثه خخخ” واجهزه اقمار صناعيه ..

اللابتوب بقى عليه برامج مشفره .. احه .. هوه فيه برامج بتنزل اوبن سورس ولا ايه ؟

طبعا .. العالم بتوع الفيك بوس دول بيضيفوا اي كلام كبير علشان يبان انهم فاهمين

وده واضح جدا فانهم قالوا انه عنده شركه “اتصالات وبرمجه” .. كلام كبير يعني ..

بالنسبه بقى للفلاشات الحديثه اللى البيانات اللى فيها مبتتقريش الا بالاشعه تحت الحمراء

فدي بصراحه معرفهاش .. ومعنى اني معرفهاش انها اختراع مصري حصري بالمخابرات

اول مره اعرف ان في فلاشه فى الدنيا بتشتغل بالانفرا ريد .. طيب كنتوا قولوا بالسنه الزرقاء (البلوتووث)

كان ممكن نبلعها .. انما واضح انها اشتغاله فشخ لان الانفرا ريد بطيئه جدا وراحت عليها يعني

اما بقى اجهزه الاتصالات بالاقمار الصناعيه .. اولا جهاز الريسيفر فى البيت ده جهاز اتصال بالقمر الصناعي

وفى انواع ريسيفرات موجوده فى البلد كتير جدا بتسمح بالاستقبال والارسال ..

وده عن طريق انه بتركب كامه مخصصه للارسال فى الطبق عالسطوح واشتراك فى شركه القمر الصناعي ..

دي كانت احد الطرق اللى انا دورت عليها لما مبارك افندي فصل النت عن مصر ..

بالطريقه دي انت بتدفع رقم عبيط جدا لشركه النت حسب استهلاك الباندويث بتاعك وبتاخد خط انترنت ..

وافتكر تقريبا ان الخدمه دي مقدمه عالنايل سات كمان ..

وفى شركه هنا فمصر بتركب الاطباق والحاجات دي بس كانت اسعارهم خرافيه بصراحه

الخدمات دي بيستخدمها بشكل اساسي الناس اللى عايشه فمناطق مفيهاش تليفونات ارضيه ..

فى الصحرا مثلا زي شركات البترول والكلام ده ..

المهم يعني .. افتكاسه ان حد يبقى عنده اتصال بقمر صناعي ده حوار عادي مش اختراع مخابراتي عظيم ..

طيب .. نيجي بقى للنقطه المهمه .. ان بشار كان بيمرر اتصالات دوليه ..

فعلا .. السكاي بي بيمرر اتصالات دوليه .. وفى زيه خمسين برنامج بيسمح بعمل اتصالات دوليه عن طريق الانترنت

باسعار رخيصه جدا .. بس .. وخلونا نركز فى بس ..

فى جهاز ابن ستين كلب فمصر .. اثري من ايام الهكسوس .. بيعشق جدا حاجه اسمها احتكار ..

عارفينه ؟

اسمه الجهاز القومي لتنظيم الاتصالات .. ده اوسخ جهاز فى مصر بعد امن الدوله !

ازاي بقى .. اولا الجهاز ده زيه زي مصر للطيران فى ايام شفيق .. محتكر كل الاتصالات الدوليه

والجهه الوحيده المسموح ليها بده هيا المصريه للاتصالات .. زي ما مصر للطيران كانت محتكره الطيران الدولي ..

طيب يعني ايه برضه .. يعني السكاي بي ممنوع يابوب ..

ماشي ممنوع قشطه يعني .. فى ناس كتير فاتحه محلات اتصالات .. ومن تحت الطرابيزه

فى ناس بتتصل دولي بسعر رخيص والناس بتعمل سبوبه حلوه من الحوار ده ..

ماهو يعني مش حلال عليهم هما يسرقوا .. والناس متاكلش عيش !

يعني مصر للطيران اسعار التذاكر فيها خرافيه وخدمتها زي الزفت ..

وبرضه المصريه للاتصالات شركه بنت تيت .. ومحتكره الخطوط الارضيه ..

والجهاز القومي ده برضه اللى بيخلي شركات الاتصالات تحط سياسه استخدام عادل

ودي اللى بتخلي الانترنت محدود .. وبتخلي شركات الموبايل تقولك اخرك 1500 دقيقه فى الشهر

يعني من الاخر بيقتلوا المنافسه فى القطاع الخاص لصالح شركات بعينها ضد مصلحه المواطن والمستخدم ..

وحط تحت ضد مصلحه المستخدم دي الف خط .. لان مش منطقي انك تقولي المصريه للاتصالات بتخسر ..

احه ماهي بتخسر علشان كلها فساد وحراميه .. اشمعنا موبينيل وفودافون واتصالات مبيخسروش ؟؟

فى المانيا لو اتصلت برقم على نفس شبكتك هتكلمه ببلاش .. مش النهب العلني اللى بتعمله المصريه للاتصالات !

المهم يعني علشان منطلعش بره الحوار .. برضه انا مش المحامي بتاع بشار .. ولا اعرف ايه اوراق القضيه بالظبط

لكن كل الادله اللى اتكتبت فى المواقع الاخباريه ركيكه جدا وغير منطقيه ..

وخصوصا نقطه انه كان بيستخدم خدمه الاتصالات الدوليه للتنصت على مكالمات القيادات فى الدوله ؟

وهما القيادات هيتصلوا من عنده ليه يعني ؟؟؟؟؟ هيا العالم دي بتدفع فواتير اتصالات اصلا !!!

دول عندهم على مكاتبهم بدل التليفون عشره ودولي وببلاش !!

فبرضه مش داخله دماغي .. وحاسس فعلا انه بيتقدم كبش فدا علشان قال يعني المخابرات شغاله ..

كمان فى نقطه الناس ردودها على الخبر غبيه جدا .. الناس بتدي احكام مسبقه ..

واعدموه وافشخوه وحاجات كده .. احه .. هوه لسه اتحكم عليه يا بهايم ..

ولو اتحكم عليه فى استئناف .. واصلا المفروض ميبقاش فى نشر للقضايا دي لغايه ما يتحكم فيها ..

لان نشر الاخبار دي فيه اهانه للمتهم واسرته وده تم بدون صدور حكم محكمه تثبت الادانه ..

ده شيء مرفوض طبعاً !

ياريت المنظمات الحقوقيه تبعت اي محامين متطوعين .. لان فعلا انا حاسس انه بريء ..

ولو مكانش بريء .. شرف المحاماه يستدعي ان الانسان يتحاكم محاكه عادله حتى لو كان مذنب !

انا ضد تنظيم الاحتكار بواسطه الجهاز القومي للاتصالات .. وضد المحاكمات العسكريه للمدنيين ..

ولولا اني لسه مخلصتش حقوق كان زماني متطوع للدفاع عنه لغايه صدور حكم يدينه او يرد اعتباره ليه ..

الا اذا كان ناوي يرتكب فيهم كل انواع الجرائم ضد الانسانيه بدون رقابه دوليه

نظام مبارك قطع :

1- الانترنت.
2- الاتصالات المحموله فى ميدان التحرير واسكندريه والسويس.
3- رسائل SMS و MMS.

فصلها عن الشركات .. عن السياح .. عن كل المصريين !

نظام مبارك صادر تصريح قناه الجزيره .. القناه الوحيده اللى نقلت الصوره بدون تدخل فيها

مش زي المحور ودريم اللى اتخذوا منحنى واضح وصريح للدفاع عن مبارك وتصويره بانه صمام الامان !

ارجوكم محدش يتفرج على القنوات دي ولا على البرامج الحواريه اللى عليها اطلاقاً ..

مبارك .. لم يقدم اي تنازلات .. وبيعاملنا بمنتهى الصلف .. والتكبر والتعالي ..

مبارك يتعامل كانه إله .. مش حتى واحد ورثنا !

الحقيقه الواضحه وضوح الشمس ..

ان الداخليه اول من بدأ باستخدام العنف تجاه المتظاهرين السلميين فى ميدان التحرير ..

فى جريمه خسيسه ووقحه .. الساعه 1 فجراً .. اتفتحت خراطيم المياه وقنابل الغاز على المتظاهرين العزل المدنيين ..

هم نفسهم اللى مبارك بنفسه قال عليهم متظاهرين حضاريين بيطالبوا بمطالب مشروعه ..

تاني يوم ادرك النظام حجم الثوره .. كان رده اعنف واسخف ..

لكن الناس مش هتستحمل الظلم ده كتير .. الناس مش هتاخد على دماغها وتسكت ..

كان لازم رد صريح لكلاب النظام .. ان عنفهم مرفوض .. ومفيش رد عالعنف الا بالعنف !

هرب كل عساكر الداخليه تماماً واختفوا من الشوارع .. حتى عساكر المرور ..

حتى طلبه الكليات العسكريه والشرطه قلعوا زيهم واستخبوا عندنا فى شارع امن الدوله فى الزقازيق ..

فى كل المحافظات الناس اتحركت تحرك جمعي واحد ..

الاهداف كانت الحزب الوطني .. اقسام الشرطه .. مراكز امن الدوله .. مجالس المدن المحليه ..

نار اشتعلت فى كل مكان .. الناس الغلابه دخلت خدت حاجتها اللى كانت مصادراها شرطه المرافق ..

الناس راحت مخازن المرور رجعت موتوسيكلاتها وعربياتها وحتى التكاتك اللى كانت مسحوبه ..

راح اللصوص سرقوا موتوسيكلات المرور واللى كان فاضل هناك فى منظر غريب ..

وخرج مبارك يقول انه راضي تماماً عن اداء الشرطه وابطالها وبيشكرهم !!!

يتبع ..

جسدياً آه لسه عايش ..

بس جوايا غضب وثوره .. ثوره ..

يوم 25 بدأنا كلنا ثورتنا .. اللى اتجاهلتها قنوات النفاق الاعلامي ..

والجزيره بدات فى التعامل معاها على استحياء ..

لكني كنت متاكد ان المظاهرات المره دي مش زي اي مظاهرات كانت قبل كده ..

مش هتكون زي مظاهرات سته ابريل اللى فاتت ولا اي مظاهره قدام مجلس الشعب ..

المره دي نازلين للنظام .. بعد ما عرفنا انه هوه بنفسه سبب كل ظلام حوالينا ..

مطالبنا واضحه وصريحه .. اسقاط النظام .. متمثل فى راس السلطه وما دونه ..

مطالبنا ببساطه حريه وعداله اجتماعيه …

دي هتكون مجموعه تدوينات لحاجات شفتها بعيني وتحليلاتي الشخصيه للاحداث ..

الاول وقبل اي شيء .. انا حزين حتى اعماقي ..

دماء بشر كتير سالت على ارضك يا مصر .. ومش هتكون آخر دماء

ناس اعرفها وناس معرفهاش .. دمهم طاهر واحلامهم كانت كبيره ..

دفعوها تمن حريتك يا وطن ..

ساعود !

الكاميرا طول الطريق كانت فايد عوف .. فهتلاقوا صور عجيبه
ولولا اني كنت سايق العربيه .. كنتوا هتلاقوا صور اعجب

اول يافطه تحدد المسافه بـ 39 كيلو متر لصان الحجر
مع الاعتذار للواد اللى تحت اليافطه .. محدش يركز معاه .. الله يفضحك يا عوف زي ما فضحته

بالمناسبه .. عوف صور حوالى 10 صور لغسيل منشور في البيوت
شكله ناوي يعتزل البرمجه ويسرق غسيل !

كان نفسي اصورها انا دي .. عاجباني جدا !

وفي الوقت اللى كان فيه عم عوف ماسك كاميرتي متمتعا بهوايتي المحبوبه التصوير
كنت انا سايق العربيه (من هواياتى برضه هع) على سرعه 110كم/س متجاوزا السرعه القانونيه بـ 30 كم/س

ومع ان سرعتى مش سريعه برضه .. الا انى كلت حوالى 5 مطابات على سرعه
بالشفا

توكتوكز

طبعا محدش يقدر يلومها .. قال وعدت فاوفت قال !!
كانت بلد ابوها هيا توعد وتوفي .. الاستاذه ساميه خليفه ..
دي مش ملكه علشان تمنحنا الحريه .. دي بلد فيها دستور ونظام جمهوري
وهيئه تشريعيه بتحط القوانين !!
ده اذا كان ده قانون يستاهل الشكر عليه اصلاً
ده تمييز غبي .. ان كان ليكي رغبه فى المشاركه السياسيه
متدخليش على مقعد المرأه .. لانه بيحمل جواه اهانه للمراه المصريه
واعتراف متواري بعدم قدرة السياسيه المصريه على منافسه الرجل المصري سياسياً !
والله يرحمك يا حتشبسوت .. تعالي شوفي حفيداتك ..

تكييفات فى الدور الارضي .. وفقر وتخلف فباقى الادوار !

لسه في يافطه مكتوب عليها تانيس .. ده شيء مبشر !
كان نفسي اخدها بزاويه احسن من كده .. بس يالا بقى نو بروبليم .. المره الجايه

ده مفترق طرق .. واليافطه لا قالت نمشي يمين ولا شمال .. هوه فى النهايه الاتنين بيوصلوا لطريق واحد
بس احنا وقفنا قدام اليافطه محتارين نمشي من انهي طريق ؟!

واخيرا وصلنا .. فى خلال السنه دي حصل تطوير ..
تم رصف طريق من الطريق الاساسي للدخول لمنطقه الاثار وتجهيز مكان لركن الاتوبيسات
لكن تم فصل المنطقه عن القريه (بقت مركز من 2006)
وده شيء انا شايف انه مجحف !
مفيش فرصه للسكان لفتح اي نشاطات تستهدف الحركه السياحيه مستقبلا
كسوبر ماركت مثلا او بازار .. الخ

No Touch any Monuments
ده انجليزي ده يا مرسي ؟؟ نو تاتش خخ !!

خريطة الموقع

ومن هنا بدات التصوير
والفضل للكلب ده .. عوف ساب الكاميرا وجري

ده يبدوا كده انه طريق جديد هيدخل على المعبد علطول ..
من المدخل الخارجي .. كلها سنه ونشوف ايه اللى هيتم هنا ..

وفيما يلي نقوش الجدران الداخليه لاحد المقابر

النقوش على الاثار فعلا بتبدا في التلاشي
مش بنفس الوضوح بتاع السنه اللى فاتت ..

دي نقوش فى سقف مدخل احد المقابر اللى استفزتنى انى ادخل جواها اشوف في نقوش تانيه فى السقف ولا لا

لكن مكانش فيه غير نقش على شكل حرف A

ده نقش مش واضح المعالم

حاولت المرادي اخد صور بزوايا مختلفه
اتمنى تعجبكم ..

ده مدخل احد الابار .. وحسب شرح احد المصاحبين لينا ..
كان بيستخدم لتخزين المياه .. ولقياس منسوب المياه فى فرع النيل التانيسي

والمرادي صححت المعلومه الخاطئه اللى اتقالتلنا المره اللى فاتت ..

الاحجار دي اتنقلت من اسوان عن طريق فرع النيل التانيسي
وتم نحتها هنا فتانيس ..

وبالمناسبه دي قلت اخد شويه صور تذكاريه .. هع

وهنا نبقى وصلنا لاخر معبد امون .. وفي الخلفيه سور المدينه
مبني من الطوب .. وعلى كل قالب في ختم للملك ..

الحجاره دى بالفعل تلاشت النقوش اللى عليها .. واعتقد بكده مبقاش ليها اى قيمه اثريه !

مبنى على شكل قبه قيل انه من العصر الاسلامي
ومش فاكر بالظبط كان ايه استخدامه …

واثناء الخروج اكتشفنا ان فى جزء تاني مستخبي مشوفناهوش المره اللى فاتت
معبد خونسو

والمعبد لسه جاري التنقيب فيه .. التنقيب بيتم فى الصيف كل سنه حوالى 3 شهور
وبيتم على ايد خبير اثار اجنبي مش متذكر اسمه
بييجي كل سنه ومعاه مجموعه من الطلبه للتنقيب
وبيجيب معاه كل سنه مصاريف التنقيب من جامعته
وده يطرح تساؤلين ..
اولهم .. هل احنا شحاتين علشان منقدرش نمول عمليات التنقيب ؟
ثانيهم .. هل معندناش كفائات مصريه تقوم بالتنقيب بشكل مستمر … ولو تطوعي ؟
نرجع لمرجوعنا .. تحت المنطقه دى في زي خزان ميه في نقوش على جدرانه

تم الردم عليه علشان ميفقدش النقوش لغاية ما يرجع الدكتور تانى ينقب !
وبكده نكون ختمنا رحلتنا داخل منطقه الاثار

منسي فى حاله انشكاح !

وبكده ياعم عوف .. يكون ذنب الواد اللى فى الاول كفرت عنه

وقبل الخروج من صان الحجر .. استفزني شيء جداً

لفظ نبايع !!
اي شخص بيدخل المجالس التشريعيه او المحليه بيدخل بالانتخاب مش بالمبايعه
انسوا الفاظ الجاهليه دي .. اسمها انتخابات !!!
مش مبايعه !!!!!!!!!!!!!!!!!!!!!

—-
الصور ملتقطه بكاميرا
Canon 450D
عدسه
18-55
بدون فلاتر
الصور مصغره للنشر (اضغط على اي صوره للتكبير)
واللى ليه رغبه فى الحصول عليها بكواليتي اعلى يقدر يطلبها .. مجاناً متخافوش

]]> http://www.ahmo.se/post191.html/feed 2