مدونة احمس

اثناء تصفحي لاحد المواقع* بالصدفه البحته
لقيت خبر عن حكم بالجلد 79 جلده على شاب امام محكمة القنفذه في السعوديه
وده مش حد من الحدود الاسلاميه .. يعني المجلود مكانش بيشرب الخمر ولا حتى بيزني
المجلود كل تهمته “تلفظه واعتداءه على رجل أمن بالقرب من أحد المجمعات التجارية”
يا حلولي يا ولاد .. يمكن ده مغاظنيش بنفس القدر اللى غاظني بيه تعليقات الناس على الموضوع !!
تأييد بنسبه 100% للحكم .. وتجاوز الموضوع الى حد الشماته وتعليقات من باب يستاهل قليل الادب !!
رد الفعل للمعلقين وهم بيمثلوا نسبه لا يستهان بها وان كانت تمثل الاغلبيه من المجتمع السعودي
فالمعارضين فى المملكه لاحكام الجلد صوتهم منخفض واعدادهم بسيطه امام هذا الطوفان المغيب على يد النظام الملكي لآل سعود ..
رد فعل الناس لا اخفيكم ذكرني برد فعل الشباب المصري على حملة لا للتجنيد الاجباري
فبالفعل التجنيد الاجباري هو عقوبه فيها انتهاك لكرامة المواطن المصري بتبدأ من اول “اقلع كرامتك والبس الميري”
وفيها انتهاك لحريته وحقوقه الانتخابيه والآدميه ده بالإضافه ان مفيش نص ديني بيفرضها على متبعي اي دين فمصر !!
فلا فى الدين الاسلامي فرض للتجنيد اجباريا ولا فى المسيحيه ولا حتى البهائيه بل ان بعض الطوائف بتحرم حمل السلاح نهائياً ..
ويمكن الاكتر من ده ان شباب كتير جدا بيدوقوا نار التجنيد فمصر وعارفين البلاوي اللى بتحصلهم بسببه
والغباء البيروقراطي المصري فى تصاريح السفر وغيرها .. وهم مقارنة باللى بيتعرضوا للجلد فى السعوديه اكبر بكتير
مع ذلك لسه بيدافعوا عنه وبنفس المنطق فاكرين فيه اصلاح للأدب والأخلاق وفاكرينه بيزرع اعتماد على النفس !!
فى حين انه بيعتبر اداه للذل والتنازل عن الكرامه واحترام الذات ..
ببساطه انا شايف ان اللى بيدافع عن التجنيد الاجباري فمصر بالظبط زي اللى بيدافع عن الجلد للى بيشتم عسكري فى السعوديه !!

* الموضوع هنا - قمت بالتأكد من الخبر من عدة مواقع اخرى لكن ادرجته لمشاهدة ردود الناس !!!