ويسترن يونيون

احمس حسن — Thu, 02 Jul 2009 11:09:50 +0000

جايلي حواله من جوجل ادسنس
طلعت على البنك العربي الافريقي اللى فسان ستيفانو
الموظف مسك البطاقه وبيقولى متنفعش علشان فيها شرخ
فين ياعم الشرخ ده ..!!
البطاقه فعلا مشروخه بطول 6 مللي تقريبا
بس هوه اصلا البطاقه دورها انها اثبات شخصيه لا اكثر وهوه هياخد منها صوره
الشرخ ده مش هيأثر معاه فحاجه .. لقيته قام مطلعلى فايل ومطلعلى ورقه منه
وبيقولى دي اوامر من الداخليه ..
طبعا انا حسيت بكميه البيروقراطيه المعششه فدماغه
شكله موظف حكومه قديم اساسا .. اه طيب شكراً
كده لازم الباسبور من الزعازيع بقى
امبارح الساعه 4 الفجر طلعت على محطه سيدي جابر
تذكره الزعازيع لو سمحت ..
مفيش مكيف الزعازيع .. تاخد اسماعليه بـ 22 جنيه ؟
قلتله لا طيب فى ابو حماد ؟
قالى لا .. تاخد بورسعيد بـ 20 جنيه
بصيتله باستعباط كده .. هات ياعم
قام مديني تذكره كانت محطوطه قدامه مع تذكره تانيه
التذكره مكتوب عليها 27 جنيه .. ممم يبدوا ان هناك خطأ ما
ماليش فيه القطر بعد 10 دقائق من الان
وصل المحطه .. العربيه رقم اتنين مش واقفه على الرصيف اساسا
نزلت مشيت بعد الرصيف على ما وصلت
المره دي لقيت الكرسي .. بس كان فى مفاجأه تانيه
اول ما القطر بيتحرك .. بينط نطه كده وبعدين يمشي عادي ..
بيتدلع يعني .. قام وهوه بيتدلع الدنيا نطرت ..
اه والله نطرت جوه القطر .. التكييف بيصبح عليا !
قام مغرقني ميه .. الله يحرق سكك حديد مصر وسنينها السوده !
قمت ناقل على الكرسي اللى جنبي ويبدوا انه كان محجوز بالتذكره التانيه اللى كانت جنب بتاعتي
قبل الزعازيع بمفيش 20 كيلو
ببص من الشباك لقيت نسوه متشحات بالسواد مجتمعين فى قريه اسمها ميت القرشي
وحشود امنيه مكثفه .. تقريبا كده 20 عربيه امن مركزي على عربيتين اسعاف ومدرعتين
وعربيتين مطافي وست بوكسات شرطه .. انا شفت المنظر ذهلت ..
وصلت الزعازيع والفار بيلعب فعبي .. خربشني فصدري الجزمه !
ام هند اتصلت بالواد عمرو .. انت فين يا صديكي .. كان فمصر
قلتله هخلص انا مشوار كده على ما توصل انت ..
وصل عمور وطلعنا على ميت القرشي

وبسؤالنا للناس طلع الموضوع مش ميه مقطوعه من فتره
واحد مسيحي قتل واحد مسلم .. يا رااااجل .. الجيش ده علشان واحد مسيحي قتل واحد مسلم ؟!!!!
انا عرفت ليه معندناش فتنه طائفيه ..

بالتواجد الامنى المكثف .. بارهاب الناس ..
ممكن حد يفهمني الدول المحترمه حلت المشكله دي ازاي ؟!
هنفضل لغايه امتى فاكرين ان النظام مينفعش يتطبق الا بالقوه والعسكر
التغيير بيكون فى ثقافه الناس وتفكيرهم .. احترام القانون بيكون بايمان الناس بيه مش بقوته
القطر اللى فى الصوره وقف فى المحطه واحنا واقفين واحد سأل هوه فيه ايه
عمر قاله ان واحد مسيحي قتل واحد مسلم .. فالراجل قام رادد والمسيحي اتقتل ؟
بجد كنت عايز اشتمه .. مسكت نفسي وقلتله انت عايزه يتقتل قالى طبعاً .. رده كان بمنتهى البديهيه ..
ولا كان فى اي احترام لحاجه اسمها نظام وقانون ودوله عايشين فغابه احنا
هل العقليات دي هي السبب فى التواجد الامنى ولا الدوله البوليسيه هو السبب فى وجود العقليات دي علشان تبرر وجودها !

هل كان المصريين كده من 50 سنه بس فاتت ..بجد يا خسارتك يا مصر ..
—————————-
* تحديث :
فيديو من العاشره مساءً يتحدث عن واقعه ميت القرشي بمزيد من التفصيل

خنازير خنازير !

احمس حسن — Sat, 16 May 2009 23:50:47 +0000

ابدأ بتعليق منظمه الصحه العالميه على قرار ذبح .. لا سوري اعدام الخنازير فى مصر
المنظمه قالت انه قرار لا يسهم على الاطلاق فى الحمايه من المخاطر على الصحه العامه والحيوانيه .
نرجع بقى للفوضى النظاميه ..
قرار جاي من سيادته (طبعاً كلنا عارفين مين هوه)
باعدام كل القطعان .. واستخدام كل المجازر .. وتعويض كل صاحب خنزير بـ 1000 جنيه عالراس
وتلاجات لتخزين اللحوم .. ياسلام ..
ايه الحلاوه دي .. قرار الذبح مالوش لازمه من الاساس
بس ازاي يعني احنا خدنا قرار .. ايه هو احنا عيال نرجع فكلامنا
طيب ياجدعان والناس اصحاب الخنازير .. دول مسيحين وهيحسوا بالتفرقه العنصريه
وعندهم حق مانتوا مدبحتوش كل الطيور اللى فمصر ومش هتدبحوا كل المواشي لو جالها حمى وادي متصدع ولا جنون بقر !
لا وأيه يطلعوا البابا يقولك المسيحيين فمصر مبياكلوش الخنازير .. مش عايز اغلط فيه احتراما لانه رمز ..
وغير كده .. قلتوا هتعوضوا الناس ..
وبعدين يتسخط التعويض من الف جنيه لرقم ميساويش كام كيلو لحمه على بعض
يعني لو بلعنا الاولانيه .. دي محدش هيبلعها
ونبدأ نسمع عن المهازل بقى
خنازير اصحابها بيطلقوها .. اهو بدل ما يدوها للحكومه برخص التراب تعدمها
ومقاومه للسلطات وامن مركزي وضرب بالطوب ..
ومن كام يوم ينشرولنا خبر تحت اسم المفتى بانه حلال دفن الخنازير صاحيه
وبعدين لقوا الخبر مش كويس طلعوا نفوه
وبعديها بكام يوم المصري اليوم يجيب فيديوهات لاعدام خنازير حيه بالكيماويات
دلوقتي بتخبطكم ده فقدتوا المصداقيه قدام الشعب بقراراتكم العشوائيه اللى طلعت منظمه الصحه والغت جدواها
وتسببتم فى احساس بالتمييز بين المواطنيين المصريين
واستغليتوا الدين علشان تبرروا جرائم ضد الحيوان .. بدات بتصريح البابا وانتهت بالفتوى المنسوبه للازهر
وقضيتوا على ثروه حيوانيه بتغذي صناعه هي التانيه من مصادر الدخل فى مصر وهيا السياحه
وقضيتوا على مصادر دخل اسر مصريه .. وطبعا الحصول على مصدر دخل بديل يعتبر مستحيل فمصر اصلاً
هتفضلوا تتعلموا فينا ازاي تمسكوا البلد لغايه امتى ؟
لو مفيش ناس بتعرف تاخد قرارات محسوبه فمصر .. يبقى نأجر حكومه ورئيس من بره احسن !

مدونة احمس » تمييز ديني

ويسترن يونيون

خنازير خنازير !