مدونة احمس

طلبة جامعه الزقازيق محتشدين امام مبنى ادارة الجامعه
للمطالبة باسقاط دكتور ماهر الدمياطي رئيس الجامعه

من كام يوم وانا متابع ايفنت اسقاط دكتور ماهر الدمياطي عالفيس بوك

ومع العلم باني لم اقابله شخصيا ولا مره خلال سنين دراستي بالجامعه ومحصلش اي موقف مباشر معاه

الا ان اسلوب المعامله اللى بنشوفه من موظفين شئون الطلبه والاداريين وحتى بعض الدكاتره فى وجوده

كان كافي اني اروح واقوله مع الشباب ارحل !

حتى لو كان رحيله مجرد رساله رمزيه .. رساله لكل الموظفين والجهات التعليميه بنوجهها احنا كشباب وكطلبه !

ان خلاص مفيش سكوت .. خلاص مش هنرضى الا بافضل مستوى ..

مطالب الطلاب فى الاساس كان اغلبها بيدور حوالين الانتخابات الطلابيه وحرية التعبير داخل الجامعه

وان كانت هناك مطالبات متعلقه بدعم الكتاب الجامعي وتخفيض المصاريف ..

تعامل الجيش كان سخيف .. ومستفز !

بالرغم من ان الطلبه هتفوا بمجرد ظهور اول قياده عسكريه امام الطلبه

الجيش والشعب ايد واحده !

الا انه حاول اولا انه يمتص غضب الشباب .. وبعد كده بدأ يستعرض مهاراته التفاوضيه مع العمال فمصانع العاشر !!

وبعدين قال عايز اتنين من كل كليه يمثلوكوا وهاخد المطالب منهم واوصلها لقائد الجيش المش عارف كام

واللى هيوصلها للمجلس العسكري .. وعلى ما يردوا .. طبعا يبقى الوضع كما هو عليه !!!!

الناس دي لسه مفهمتش اننا مصدر الشرعيه مش المجلس العسكري !!

ان اللى نقوله هوه اللى يمشي مش كلام المجلس العسكري

ولو وصل الامر لان المجلس العسكري نفسه يمشي هنمشيه !!!

مفيش صوت فوق صوت الشعب .. مفيش صوت فوق صوت ثورتنا !!!

المهم .. انسحبنا وسبنا شويه كده يكمل ضحك عليهم ..

ورحنا عملنا مظاهره تانيه .. وبعد كل اللى بناه دخلنا هديناه تاني وورينا بقى هتثبت مين المرادي

مفيش ساعه الا ووصل خبر قبول المجلس العسكري لاستقاله الرئيس ..

بس خلاص .. شكراً .. شوفتوا الموضوع سهل ازاي

اقاويل بقى متناثره من هنا وهناك ومقدرش اثبت حاجه منها لاني مطلعتش على اي اثباتات ليها :

1- رئيس الجامعه مرتبه 300 الف جنيه شهري

2- نائب الرئيس مرتبه الشهري 150 الف جنيه شهري

اقاويل تانيه ترددت عن ان ماهر الدمياطي اتقدم باستقالته من يومين للمجلس العسكري

والمجلس رفض الاستقاله !

—

ملاحظات بقى سريعه :

فى ملصقات كتير جدا فى الجامعه بتدعوا لرفض الدوله العلمانيه ولافته كان مكتوب عليها بالنص

“تحذير من المساس بالماده التانيه من الدستور – الشباب السلفي”

انا مش خايف من التحرك السلفي او الاخواني السرطاني فى الجامعه ولا رافضه !

اذا كنا بنطالب بديمقراطيه وحريه فهي للجميع ومن حق كل انسان انه يعبر عن رأيه وفكره

ومن حق الناس انها تختار الفكر الانسب ليها .. وفتصوري .. لاهو الاخواني ولا السلفي

اللى يبص بنظره سريعه كده على الشباب المتظاهر والمتجمع .. مش دول اللى ممكن حتى يبقوا سلفيين او اخوان !!

لكن فى المقابل .. لازم يبقى فى تحرك فوري مكافيء ومنافس .. من كل القوى السياسيه اليساريه

اشتراكيين وليبرالين وديموقراطيين .. ولو تطلب الامر تآلف القوى فى المرحله دي لغايه الانتخابات الجايه

لان فعلا مينفعش الساحه تفضل موجوده قدام التيارات اليمينيه فقط ..

تخيل تصحى من النوم تلاقى جماعه دينيه جديده طلعت
وواقفه الند بالند للاخوان .. وقوم فجاه لقينا تيار سياسي سلفي على تيار سياسي شيعي
قوم فجأه لقينا خمسين مرشد اعلى وخمسين آية الله
وناس بتلبس جلاليب بيضه وناس بتلبس جلاليب سوده
وتبقى الاستجوابات فمجلس الشعب من عضو كتله السلفيين للوزير عضو الكتله الاخوانجيه
وقبل الانتخابات تبدأ حملات التكفير والفتاوي على ودنه
ده فلان بيحضر مؤتمرات الحكومه فى شرم الشيخ .. ده فاسق ولا يجوز اتباعه ..
وفلان بيشرب سجائر .. وفلان بنته غير منتقبه .. وفلان ابنه كان فديسكوا فالغردقه بيشرب المسكر
تخيل بس معايا فكره ان مش الاخوان بس اللى بيمثلوا التيار الديني فمصر
المنافسه بين التيارات دي ممكن توصل بينا لفين
ايه ممكن يحصل فالبلد !!؟