مدونة احمس

بما اننا عايشين فى مدينه مصابه بتلوث مزمن اسمها الزقازيق ..

فامراض الصدر والحساسيه دي شيء عادي جدا .. وبنظره بسيطه لاي عياده صدر تقدر تتاكد من ده ..

انا عندي حساسيه موسميه .. والعلاج اللى كان مؤثر وكنت بستخدمه لما بتجيلي الحساسيه

كان الاوربازون 8 مجم .. ده عباره عن شريط فيه 10 حبوب .. كان سعره 8 جنيه تقريباً

الاوربازون الماده الفعاله فيه هيا الكورتيزون .. وبغض النظر عن التفاصيل الطبيه للموضوع

الا ان الاوربازون ده بدأ فى الاختفاء تدريجيا من جميع الصيدليات فى الزقازيق

كنت بجيبه من اسكندريه من صيدليه ما مستخبيه كده حتى اختفى تماما

طبعا توجهت للدكتور علشان يكتبلى بديل .. وفضولي خلاني استفسر منه عن سر اختفاء الدوا

قالى ان الدوا ده سعره لم يتغير من اكتر من عشر سنين .. وان الوكيل بطل يصنعه فى مصر لانه بيخسر !

السخيف فى الموضوع ان مالوش بديل !!

والاسخف ان نفس الدوا المستورد من الشركه الام سعره يتجاوز 200 جنيه …

فى ادويه فمصر .. صحيح .. لكن المؤكد ان جودتها اقل بكتير من الادويه الموجوده فى الدول المحترمه ..

فى ادويه فمصر .. صحيح .. لكن الاسعار منخفضه .. والحاله العلاجيه للمواطن لا يوجد تامين حقيقي عليها ..

طيب .. ايه بقى موضوع حكم الاداريه العليا ؟

من يومين بالظبط انتشر خبر تاييد الاداريه العليا لقرار وزير الصحه بربط سعر الدواء فى مصر بالسعر العالمي

الخبر كان غير واضح .. الا انه كان واضح فيه ان ده ينطبق على الادويه الجديده فقط ..

فى بعد اخر اسمه صناعه الدواء فى مصر .. والقطاع ده بيعاني من خساير وتدهور !

مصر كانت بتصدر ادويه لدول عربيه وافريقيه .. وده قطاع لازم يرجع يشتغل تاني ..

وبكده يختفي الاوربازون واتصور انه هينزل باسم جديد ..

والقرار ده مفيد للصناعه .. وان كان مش هيفيد المواطن بشكل مباشر على المدى القصير ..