مدونة احمس

فى هذه المرحله لا توجد الا قوتان منظمتان لديهما القدره على التنظيم

ولديهما الخبره السياسيه لخوض اي انتخابات مقبله .. وهم الحزب الوطني والاخوان المسلمين ..

والمطالبات بجعل الانتخابات النيابيه تاتي بعد الانتخابات الرئاسيه هي مطالبات مشروعه

لاعطاء الفرصه لظهور حركات وتجمعات واحزاب سياسيه جديده على الساحه

وتثقيف المجتمع سياسيا وتوفير اكثر من بديل امامه للاختيار ..

عبور هذه المرحله فى سلام لن يكون من مصلحة بعض الاطراف .. كيف ؟

بعض التيارات الدينيه التى لا تؤمن بفكرة الدوله المدنيه .. تعلم جيدا ان موقفها سيكون ضعيفاً

اذا تم وضع دستور مدني يسمح بالحراك والمعارضه فى اطار علماني ..

وهذا بالطبع سيقلص من السلطات الدينيه على الدوله والمدنيين !

ستحاول هذه الاطراف وقد تكون مدعومه من جهات استخبارات لدول معروف عنها تمويل مثل هذه الجماعات

ان تسعى الى تصفيات جسديه للاصوات المدنيه ذات الشعبيه

والقادره على توصيل الفكر العلماني بشكل مبسط الى الناس

كما انها ستقوم بحرب ضروس اعتقد انها بدات بالفعل ضد المساس ببعض مواد الدستور المتعلقه بدين الدوله

ومصادر التشريع الخ !

هناك فى الاتجاه المقابل التيارات التى ستسعى لاجهاض اي محاولات لاقحام الدين فى الدستور الجديد

والقوانين الجديده .. بعض هذه التيارت تؤمن بانه لتقوم دوله علمانيه فى مصر فهي تحتاج الى ثوره عسكريه

كنموذج تركيا مثلا .. وايضا كنموذج عبد الناصر .. فلكي تطرح فكرا اشتراكيا مثلاً .. انت ستصارع قوى دينيه عنيفه !

هذه التيارت قد تمول عمليات اغتيال ايضا لبعض الرموز الدينيه ذات الشعبيه الرافضه للدوله المدنيه

لكي تهيء المناخ الهاديء للتعديلات والقوانين وعدم توتر الامور التى قد تصل الى حد حمل السلاح

واقصاء الاخر من قبل الجماعات الدينيه تحت اسم الجهاد والدفاع عن الدين ..

بالتاكيد لن يربح احد اذا وصلت الامور الى مرحلة سفك الدماء .. وان كان هناك ثمن دوماً للحريه .. لا بد من دفعه !

القوانين التى تجرم البناء فى الاراضي الزراعيه هي قوانين تنتهك حق الملكيه ..

الارض ملك للمواطن يتصرف بها كما يشاء ..

لا يحق للدوله تجريم البناء ..

يحق لها فرض ضريبه تبوير (بما يعادل رسم استصلاح لنفس المساحه)..

او عليها ان تقوم باستبدال الارض الزراعيه بمساحه صالحه للبناء فى مدينه جديده مثلا ..

لكن ما يحدث الان من هدم لبيوت الفلاحين التى بنوها على اراضيهم هو انتهاك لحقهم فى التصرف فى ممتلكاتهم ..

ميدان التحرير .. ميدان الحريه

كان هدف ملايين المصريين والاف المصورين والصحفيين الاجانب

ووجود المتحف المصري وموقعه فقلب القاهره بيخلوه مقصد لناس كتير جداَ

وبصراحه عجبني جدا اقتراح اخت عربيه عالفيس بوك لفكره نخلد بيها ذكرى ثورة الحريه والشباب

الفكره زي ما كتبتها :

لو سمحتم عايزين كل الشباب وكل المسؤولين يهتموا بميدان التحرير لان كل شخص سواء كان عربي او اجنبي كان بيتابع الثورة اصبح حلمه انه يزور ميدان التحرير … انا عن نفسي انا واولادى…اول مكان راح نزوره في القاهرة لما ننزل مصر هيكون ميدان التحرير فياريت تضعوا فيه صور كثيرة للثورة من اول يوم بدأت فيه حتى النهاية وممكن كمان فيلم تسجيلى مختصر للثورة يعيد تشغيله مرة بعد مرة وكل صور الشهداء ونبذة عن حياة كل شهيد.وشكرا

الفكره مش لازم تتنفذ بالشكل ده .. لكن الميدان لازم يحتوي على رمزيه عن الثوره لانه من اهم الاماكن اللى ارتبطت بيه .. الافكار التقليديه هي اننا نعمل تمثال للشهداء ويبقى مزار سنوي تقام فيه احتفالات من تاريخ بدايه الثوره حتى سقوط مبارك .. ياريت كل واحد عنده فكره افضل يقولها وننشرها للتنفيذ ..

وفى النهايه احب اسيبكم مع صوره لميدان التحرير سنه 1981 ..

الاول كده .. كلنا مبسوطين وفرحانين وسعداء بشكل لا يوصف !

الناس بترقص وتزغرط فى الشوارع ..

اخيرا مبارك مشي .. الكرامه رجعت

من النهارده هنبني مصر الجديده

مصر الحره .. مصر الحديثه .. مصر ما بعد مبارك

من النهارده هنبدأ ثورة مصر الحقيقيه !!

دلوقتي .. مطلوب من كل شباب مصر

اننا نشتغل ايد واحده علشان مصر تبقى وطن نستحق نعيش فيه !

دي مسأله تحدي دلوقتي .. لازم نثبت للعالم كله اننا نستحق الحريه

اننا نستحق الحضاره .. اننا شعب محترم !

لازم نشتغل كلنا .. ننفذ افكارنا الجريئه .. منخافش من حاجه ..

هنبني الاقتصاد الحر وهنخلي فى تنافس وفرص عمل

وهنقدر المبدع والمفكر ..

عايزين المصري يحترم فى العالم كله !

كل الناس دلوقتي مطلوب منها تقرى وتكتب

تكتب عايزه مصر الجديده يكون شكلها ايه ..

عايزين نرجع لدوله السبع الاف سنه حضاره اسمها من جديد !

الرهان على نجاح الثوره كان متوقف على رد فعل الناس النهارده

بعد الحمله اللى بداها النظام والقنوات التابعه ليه لاجهاض الثوره بحجج واهيه

زي الحفاظ على الامن وان مبارك وعد ونفذ كل المطالب والاتجاه اللى بيقول ان الناس تصبر الكام شهر الفاضلين دول

للاسف الاجيال العجوزه بترضى باقل من القليل .. مبارك فعلياً مقدمش اي حاجه ..

صوت العقل بيقول ان مبارك استخدم عواطف الشعب وضحك عليه

والاعلام ضلل الناس وكدب عليهم

الحقيقه ان النظام هو اللى اتسبب بكل الفوضى اللى حصلت فى البلد

الحزب الوطني هو سبب كل الخراب اللى حصل فى مصر والنهب والسرقه والدمار

مش المتظاهرين ولا المطالبين بخروج مبارك من السلطه ..

المهم .. الثوره حتى الان نجحت جداً .. حجم الناس اللى فهمت الخدعه ورفضتها

كان مشجع جداً .. فى اتنين مليون مصري فى ميدان التحرير !

دلوقتي مبارك فقد الشرعيه داخلياً .. ودولياً ..

توقعي ان مبارك دلوقتي بيدور على افضل اسلوب يخرج بيه من الحكم

والبلد متدخلش فدوامه من بعده .. مبارك لازم يخرج بشكل يضمن هدوء جميع الاطراف

الجيش والمعارضه وانصار النظام !

مبارك هيحاول يضمن عدم انهيار وضع الجيش

كمان هيحاول يضمن عدم وصول التيارات الدينيه للحكم او نشر فكرها فى المجتمع

وهيحاول بقدر المستطاع يضمن خروج امن لنفسه وللمقربين

مش بس كده .. هيحاول يسيب وراه اللى يضمن ان صورته تفضل محفوظه فى التاريخ

او على الاقل عدم السماح بتشويهها ..

اعتقد كل ده هيتضح من خلال رد فعل سواء بخطاب او اجراء اخر فى اقل من 48 ساعه ..

اجراءات النائب العام الوقائيه ضد الوزراء ورموز النظام السابقين غير كافيه

يجب مد تغطيه التجميد البنكي لجميع الاقارب حتى الدرجه الثالثه وكل من تربطه بهم علاقات مباشره

يتم تجميد حساباتهم ووضع اموالهم تحت الحراسه حتى يتم مراجعة كل ثروتهم ومصادرها !

التجميد لازم تتسع مظلته لتشمل اعضاء الحزب الوطني واعضاء المجالس النيابيه والمحليه ..

مين يقول ان فى رئيس فى الدنيا يقطع وسائل الاتصالات عن شعبه

الا اذا كان ناوي يرتكب فيهم كل انواع الجرائم ضد الانسانيه بدون رقابه دوليه

نظام مبارك قطع :

1- الانترنت.
2- الاتصالات المحموله فى ميدان التحرير واسكندريه والسويس.
3- رسائل SMS و MMS.

فصلها عن الشركات .. عن السياح .. عن كل المصريين !

نظام مبارك صادر تصريح قناه الجزيره .. القناه الوحيده اللى نقلت الصوره بدون تدخل فيها

مش زي المحور ودريم اللى اتخذوا منحنى واضح وصريح للدفاع عن مبارك وتصويره بانه صمام الامان !

ارجوكم محدش يتفرج على القنوات دي ولا على البرامج الحواريه اللى عليها اطلاقاً ..

مبارك .. لم يقدم اي تنازلات .. وبيعاملنا بمنتهى الصلف .. والتكبر والتعالي ..

مبارك يتعامل كانه إله .. مش حتى واحد ورثنا !

الحقيقه الواضحه وضوح الشمس ..

ان الداخليه اول من بدأ باستخدام العنف تجاه المتظاهرين السلميين فى ميدان التحرير ..

فى جريمه خسيسه ووقحه .. الساعه 1 فجراً .. اتفتحت خراطيم المياه وقنابل الغاز على المتظاهرين العزل المدنيين ..

هم نفسهم اللى مبارك بنفسه قال عليهم متظاهرين حضاريين بيطالبوا بمطالب مشروعه ..

تاني يوم ادرك النظام حجم الثوره .. كان رده اعنف واسخف ..

لكن الناس مش هتستحمل الظلم ده كتير .. الناس مش هتاخد على دماغها وتسكت ..

كان لازم رد صريح لكلاب النظام .. ان عنفهم مرفوض .. ومفيش رد عالعنف الا بالعنف !

هرب كل عساكر الداخليه تماماً واختفوا من الشوارع .. حتى عساكر المرور ..

حتى طلبه الكليات العسكريه والشرطه قلعوا زيهم واستخبوا عندنا فى شارع امن الدوله فى الزقازيق ..

فى كل المحافظات الناس اتحركت تحرك جمعي واحد ..

الاهداف كانت الحزب الوطني .. اقسام الشرطه .. مراكز امن الدوله .. مجالس المدن المحليه ..

نار اشتعلت فى كل مكان .. الناس الغلابه دخلت خدت حاجتها اللى كانت مصادراها شرطه المرافق ..

الناس راحت مخازن المرور رجعت موتوسيكلاتها وعربياتها وحتى التكاتك اللى كانت مسحوبه ..

راح اللصوص سرقوا موتوسيكلات المرور واللى كان فاضل هناك فى منظر غريب ..

وخرج مبارك يقول انه راضي تماماً عن اداء الشرطه وابطالها وبيشكرهم !!!

يتبع ..