مدونة احمس

قررت النهارده اني اروح اعمل بطاقتي الانتخابيه
قمت مصور بطاقه الرقم القومي نسختين احتياطا
وضارب قلم فجيبي احتياطا برضه
وواخد نفسي وطالع على القسم التابع ليه سيادتي
الا وهو فى حالتى قسم ثان الزقازيق ..
وصلت القسم .. العسكري اللى على الباب بيقولى سيب الموبايل
استعبطت وقلتله معييش موبايل ..
مش فاهم انا بانهي مرجعيه قانونيه بيمنعوا الناس من حيازه وسائل اتصال داخل اقسام الشرطه !!
طلعت الدور الاول علوي .. شمال فشمال لقيت اللجنه الانتخابيه فوشي فآخر الطرقه
دخلت اللجنه .. سالني الموظف انت مولود فين بالظبط .. وقام ماسك ملف طويل عريض
خد البطاقه وقعد يدور على اسمي فى الملف .. وحدث ما كان فى الحسبان ..
انا مش متقيد .. طيب ايه العمل ..
هات ورقه طلب قيد فى الجدول من الاستاذ ده (مكتب على اليمين فى نفس الغرفه)
اداني الورقه .. مليت البيانات (الاسم والمهنه وتاريخ الميلاد والعمر والعنوان الخ)
الموظف مضى عليها وقالى روح امضيها من مأمور القسم ..
المأمور فنفس الدور .. هتاخد يمين فشمال فآخر الطرقه هتلاقي مكتبه على يمينك
بس لما رحت لاقيته قافل ومش موجود .. رجعت للافندي تاني
قالي انزل بقى لنائب المأمور تحت .. خدت السلم ونزلت
مكتب نائب المأمور على الشمال وانت نازل من السلم
دخلت وقع على الورقه وطلعت تاني
اديت الطلب وصوره من بطاقه الرقم القومي للموظف
كتب اسمي فملفين كبار .. واحد للمديريه والتاني مش عارف بتاع ايه
واداني رقم وقالى ده الرقم الانتخابي بتاعك .. وتعالى استلم البطاقه فشهر 4/2010
وبكده انتهت التجربه على خير ..
جدير بالذكر انك ممكن متحتاجش تعمل كل ده ويكون اسمك متسجل ويتعملك البطاقه وانت واقف
بس ممكن يتعمل فيك زيي كده .. المهم انك متأنتخش وتروح تعمل البطاقه مادمت اكبر من 18 سنه
وخلى بالك فى انتخابات مجلس الشعب السنه الجايه .. والسنه اللى بعدها الانتخابات الرئاسيه ..
متضيعش الوقت وروح طلع بطاقتك الانتخابيه

استعجبت كثيراً من موقف عدد لا يستهان به من المصريين الرافضين لقرار حظر المآذن فى سويسرا
فكبدايه .. لا يحق لنا لوم شعب على حق تقرير مصيره .. مادام لم يخالف القوانين والاعراف الدوليه
النقطه الثانيه استفزني جدا مقارنه البعض للمسلمين فى سويسرا بالمسيحيين فى مصر
هي مقارنه حمقاء فعلاً .. فبغض النظر عن وجوب حصول المسيحيين فى مصر على تصريح من رئيس الجمهوريه
قبل بناء او ترميم اي كنيسه .. الا ان هؤلاء الرافضين نظروا للموضوع من نظرتهم الاسلاميه
تعالوا ننظر للموضوع بنظرة مجتمع مسيحي علماني فى اغلبه (لا يعني على الاطلاق بان كل مسيحي هو علماني)..
موقف الدين الاسلامي من منظور المسيحيه هو دين غير معترف به
فالمسيحيه لا تعترف الا بما يسبقها من الاديان كاليهوديه
تقريبا كموقف الدين الاسلامي من الدين البهائي فهو لا يعترف به ايضاً ..
اذا فمقارنه المسيحيه فى مصر بالاسلام فى سويسرا غير منطقي ادبياً
لكن قانونيا .. سويسرا تعترف بحق اقامه دور العباده لاي دين ايا كان ..
وهو ما لا تتمتع به الاقليات الدينيه كالبهائيه فى مصر ..
ثالثا .. نحن بحاجه الى جلد الذات اولاً ..
فالغوغاء من الشعب المصري هم من قاموا بتهجير البهائيين فى الشورانيه وحرق منازلهم
ولم نسمع صوتاً للمتشدقين بحق المسلمين فى بناء المآذن فى سويسرا يحرك ساكناً ..
والغوغاء من المصريين ايضاً هم من احرقوا من ايام قليله محلات المسيحيين فى فرشوط وسط تكتم اعلامي غير عقلاني
انا فى النهايه مع حق الاعتقاد وحق الدعوه للدين .. وان تكون هذه الحقوق مكفوله دولياً ..
ولكن .. يا من تطالبون بحق المسلمين فى العباده والدعوه للاسلام .. هل تقبلون التبشير بالمسيحيه فى دولكم ؟
هل تقبلون الدعوه للبهائيه او البوذيه او حتى الإلحاد على الاراضي المصريه ؟
اذا لا داعي للتحامل على الشعب السويسري .. فرهاب المختلفين موجود لدى كل الشعوب ..

في طريق العوده من الاسماعيليه الى الزقازيق عبر الطريق الزراعي
قبل مدينه ابو حماد بحوالى 5 كيلومترات ..

الطريق مستواه سيء جدا وغير مضاء فاغلب فقراته

لكن حسب ما رايت انه جاري فصل الاتجاهات وعمل ازدوج للطريق بدايه من الاسماعيليه

وتقريبا في كوبري جاري بناءه قبل ابو حماد ..

لما يكون فى حرامي ما
فى منطقه سكنيه ما
وتروح تسأل اهل المنطقه عنه
علشان متقدم لبنتك
ويقولولك انه زي الفل … يبقى انت اكيد فمصر ..
لما تبقى فى بنت فيها اللى مكفيها زي ما بيقولوا
وتسال اهل منطقتها .. وخصوصا الشباب
ويقولولك انها زي الفل وبنت ناس
يبقى انت اكيد فمصر ..
هما شايفين انه من الاخلاق والمروءه انهم يتستروا على سمعتها
لكن انا شايف انه كفايه بقى كدب ونفاق وخداع
لازم ييجي الوقت اللى البروستتيوت فيه تبقى واضحه للمجتمع مش لابسه خيمه سوده ..
ولازم الناس تفهم ان الحقيقه مهما كانت صادمه احسن بكتير من صدمة انك يتكدب عليك !!