مدونة احمس

من كام يوم كنت فكافيه تشيل اوت chill out عندنا فى الزقازيق
كان فى يافطه مكنتش منتبه ليها قوي ..

مريم كانت فى الكافيه ..
كانت بتعرفني على اصدقاء جدد ليها
وقلت اما اروح اجرب العب البلياردو اللى ملعبتوش بقالى خمس سنين ده
مريم طلبت تلعب .. لقيت الويتر بيقولى ممنوع لعب البنات ..
قلت نعم .. ايه العنصريه دي ؟؟!
انا هنزل اصور اليافطه اللى تحت بقى
مريم تطوعت وقالت هنزل اصورها انا
وانا اعلنها من هنا .. لا تشيل اوت من اليوم
لغايه ما يعدلوا القوانين العنصريه دي ..
اللى عايزه تشرب شيشه من حقها تشرب شيشه .. هيا حره
واللى عايزه تلعب بلياردو تلعب .. هيا حره برضه
وفى بدل شيل اوت خمسين كافيه تاني !

صحيت من النوم عالساعه 3 العصر
التكييف جابلى برد محترم ..
بس اهو ارحم من فرن العيش البلدي اللى مصر محطوطه جواه اليومين دول
تليفون من ابن عمي .. هيا بنا نتببسن فى البسين ؟
قلتله هيا بنا ياعم الحج
الساعه 4 الا تلت نزلت من البيت نطيت فاول تاكسي
استاد الشرقيه لو سمحت ..
وصلنا عند المحطه والدنيا مزحومه زحمه سواد
تليفون من ابن عمي بيقولى انزل وخدها مشي لانهم قافلين الطريق
قابلته قدام سفنكس .. واليكم الاخبار بالتفصيل :

تحويل مسار السيارات

سيارات اطفاء واسعاف امام مبنى المحافظه
وسياره كشف المتفرقعات امام قصر الثقافه المقابل لمبنى المحافظه

كردون امني يغلق منطقه مبنى المحافظه من جميع المنافذ

اثناء التصور سمعنا صوت انفجار بسيط لم نستطع تحديد مصدره
لم يتم الافصاح لنا عن اي معلومات بخصوص ما يحدث بالفعل

بعد ذلك انصرفت سيارات الامن المركزي .

اللى غايظني بقى اني وصلت حمام السباحه متأخر
بص قشده قعدتلى ساعه وربع ببسن فى البسين ..
وفى حاجتين ضايقوني النهارده .. اولهم الفيديوهات بتاعه اعدام الخنازير
وريتني قد ايه الاسلوب همجي وقذر .. وبجد اللى بيحصل من الناس دي تشويه لسمعه مصر
ماتيا كنت بتريق عليها ومسميها “Dogs Killer” علشان بتدي الكلاب الكبيره فى السن حقنه تنويم
وبعدين حقنه بتوقف عضله القلب .. من وجهه نظري ده كان قتل فى الاول وفى الاخر مهما دافعت عنه
لكن اللى بيحصل مع الخنازير ده بجد اسلوب مش لاقى كلمات اقدر اوصفه بيها !
تاني حاجه خبر وفاه حفيد مبارك .. صحيح شعرت بالحزن لوفاته فسن 13 سنه
لكن انتشار الخبر فى جميع وكالات الانباء وفى جميع مواقع الانترنت حتى انه انتشر على الاستاتيوس
لتلت اربع الفريندس عندي فى الفيس بوك حسسني ان مبارك هوه اللى مات مش حفيده !

ابدأ بتعليق منظمه الصحه العالميه على قرار ذبح .. لا سوري اعدام الخنازير فى مصر
المنظمه قالت انه قرار لا يسهم على الاطلاق فى الحمايه من المخاطر على الصحه العامه والحيوانيه .
نرجع بقى للفوضى النظاميه ..
قرار جاي من سيادته (طبعاً كلنا عارفين مين هوه)
باعدام كل القطعان .. واستخدام كل المجازر .. وتعويض كل صاحب خنزير بـ 1000 جنيه عالراس
وتلاجات لتخزين اللحوم .. ياسلام ..
ايه الحلاوه دي .. قرار الذبح مالوش لازمه من الاساس
بس ازاي يعني احنا خدنا قرار .. ايه هو احنا عيال نرجع فكلامنا
طيب ياجدعان والناس اصحاب الخنازير .. دول مسيحين وهيحسوا بالتفرقه العنصريه
وعندهم حق مانتوا مدبحتوش كل الطيور اللى فمصر ومش هتدبحوا كل المواشي لو جالها حمى وادي متصدع ولا جنون بقر !
لا وأيه يطلعوا البابا يقولك المسيحيين فمصر مبياكلوش الخنازير .. مش عايز اغلط فيه احتراما لانه رمز ..
وغير كده .. قلتوا هتعوضوا الناس ..
وبعدين يتسخط التعويض من الف جنيه لرقم ميساويش كام كيلو لحمه على بعض
يعني لو بلعنا الاولانيه .. دي محدش هيبلعها
ونبدأ نسمع عن المهازل بقى
خنازير اصحابها بيطلقوها .. اهو بدل ما يدوها للحكومه برخص التراب تعدمها
ومقاومه للسلطات وامن مركزي وضرب بالطوب ..
ومن كام يوم ينشرولنا خبر تحت اسم المفتى بانه حلال دفن الخنازير صاحيه
وبعدين لقوا الخبر مش كويس طلعوا نفوه
وبعديها بكام يوم المصري اليوم يجيب فيديوهات لاعدام خنازير حيه بالكيماويات
دلوقتي بتخبطكم ده فقدتوا المصداقيه قدام الشعب بقراراتكم العشوائيه اللى طلعت منظمه الصحه والغت جدواها
وتسببتم فى احساس بالتمييز بين المواطنيين المصريين
واستغليتوا الدين علشان تبرروا جرائم ضد الحيوان .. بدات بتصريح البابا وانتهت بالفتوى المنسوبه للازهر
وقضيتوا على ثروه حيوانيه بتغذي صناعه هي التانيه من مصادر الدخل فى مصر وهيا السياحه
وقضيتوا على مصادر دخل اسر مصريه .. وطبعا الحصول على مصدر دخل بديل يعتبر مستحيل فمصر اصلاً
هتفضلوا تتعلموا فينا ازاي تمسكوا البلد لغايه امتى ؟
لو مفيش ناس بتعرف تاخد قرارات محسوبه فمصر .. يبقى نأجر حكومه ورئيس من بره احسن !

تخيلي نفسك بتاكلي سندوتش بتعشقيه لمده 10 شهور كل يوم ..
طيب تخيلي لمده 10 سنين .. مدى حياتك ؟
محتمل هييجي يوم وتزهقي .. تملي .. تغيري .. تجددي !
الحب برضه بالنسبالى كده ..
هبقى بكدب عليكي لو قلت اني هفضل احبك طول عمري
هبقى كداب لو قلت ان حبي ليكي من اول يوم عرفتك لاخر يوم سبتك كان متساوي فى الكم
لو كنتى محتاجه حد يقنعك باوهام .. مش هيكون انا
انا مقتنع انه ممكن ييجي يوم و الحب ينقلب كره
ممكن ييجي يوم هتكوني فيه ماضي وذكرى
وممكن ميجيش .. لكن مقدرش اوعدك بده ..
ومعتقدش حد كمان ممكن يقدر ..
ومش هصدقك لو قلتى انك هتفضلي تحبيني طول عمرك
مهما حلفتي ومهما وعدتي .. بتكدبي ولو مش حاسه
متضربيش مثل بناس متجوزه وعايشه كويسه
كل واحد فيهم لولا القواعد والقيود كان هرب
كل واحد فيهم لو عنده الحريه كان هيكسر النمط
وانا بعشق حريتي .. اكتر من نفسي ومن حبك !

عندما اخبرتها ان الحب فى اوطاننا نوع من الجنون
من الممكن للارواح فى سبيله ان تهون
نظرت لي باستغراب .. وسالت لما ؟
لم اكن ادرك وقتها ..
لكن الان ادرك جيداً
سبب واحد قد لا يكون الوحيد
خوف من المستقبل يا صديقتي
فمن يدري ان كان سيجد حباً آخر
فى وطن حتى فرص الحب فيه .. محدوده !

الماده 9 في الدستور تنص على :
الأسرة أساس المجتمع ، قوامها الدين والأخلاق والوطنية.
وتحرص الدولة على الحفاظ على الطابع الأصيل للأسرة المصرية وما يتمثل فيه من قيم وتقاليد ، مع تأكيد هذا الطابع وتنميته فى العلاقات داخل المجتمع المصري.

الاساس العام الواجب فرضه هو قوامه القانون وليست القوامه الدينيه
فهناك العديد من الدول يسكنها اغلبيه ملحده ومع ذلك يتم فيها احترام القانون والحقوق بوضوح
وفكره احترام الناس للقانون لانه نابع من منشأ ديني فكره اثبتت فشلها مع ارتفاع معدل الفساد الواضح ..
الوازع الديني تم التخلي عنه فى الدول المتحضره واصبح هناك بحث عن حلول قانونيه
تنظم الحياه المجتمعيه وسلوك المواطنين ..
ثم كيف نضع الاخلاق كاساس للمجتمع ؟
كيف سيمكن تحديد هذه الاخلاق ؟
مثلا اي اخلاق سنتبع اخلاق الستينات ام الثلاثينات ام الثمانينيات ؟
ما اريد ان اقوله .. ما الضرر فى ان يكون اساس المجتمع هو الفرد
وان يكون قوامه الالتزام بالقانون واحترامه !

قعدت ساعه اشرحله ان مش مهم دين الانسان ايه
بقدر ما هيقدر يقدم ايه للبلد ويخدم الناس
مش مهم يكون بيشرب خمر او بيمارس الجنس بزواج او من غير
بقدر ما هيقدر يطور صناعه او يوفر فرص عمل !
قعدت افهمه انه من الغباء اننا نقعد نتخانق على الدين والفكر الشخصي
واننا المفروض نتجمع كلنا على اساس الوطن والانسانيه
ونبدا ننتج الخير للكل .. لاننا كلنا مفيش فرق بينا
قعد يقولى كلامك مظبوط وميه ميه
وبعد ده كله لقيته بيقولى ممكن اسالك سؤال ؟
قلتله اكيد اتفضل ..
قالى انت بتصوم رمضان !