مدونة احمس

احد الاصدقاء النهارده قال ان اكتر درس استغرقه فى الوقت هو انه مش هيقدر يعمل كل شيء بنفسه !

ودي مأساه حقيقيه عندنا فمصر .. دي مأساة كل رجل اعمال .. كل اداري .. كل مصري ..

فى معضله حقيقيه بتقابلني .. وهي اني عايز اعمل كل حاجه بأيدي وده لأسباب كتير منها

عدم وجود ناس اقدر اعتمد عليهم من ناحية الكفائة ومن ناحية الثقه

ارتفاع تكلفة الاعتماد على الآخر ذو الكفاءه ..

وده بيوصلنا لوقت كتير ضايع ومجهود كتير كان من المفروض انه ينصب فى مجال التخصص

مش هينفع اتعلم برمجه وتصميم وتسويق وادارة وخدمة عملاء وابقى الشخص الوحيد فى المشروع !

ده فعلا انتهاك وفشل ..

المأساة الحقيقيه ان ده سبب فى فشل المجتمع المدني المصري

قوة اي دولة فى العالم مبنية على قوة المؤسسات الموجوده فى المجتمع

سواء مؤسسات اقتصاديه او حقوقيه او اجتماعيه او علميه الخ

مشكلة مصر الحقيقية هي ان كل مؤسسه فمصر على الاغلب بناها شخص

او بيسيطر عليها شخص .. او ماشيه بفكر شخصي او او …

مؤسسة الفرد الواحد موجوده فمصر من نموذج البقال الى نموذج رئيس الجمهورية !

وده شيء لازم يندثر .. ولازم يتوجد فى المجتمع ده مؤسسات مدنيه قادرة وقوية ومنظمه

متنهارش بمجرد وفاة شخص او خروجه من دايرتها فى حالة فشله !

النهارده سجلت فيديو فى شارع وادي النيل فى الزقازيق

لحمله دعائيه للاخوان المسلمين

بيستخدمو الدين بشكل صريح فى تسويق مرشحيهم لمجلس الشعب

“الاسلام هو الحل .. شرع الله عز وجل”

الاسلوب السخيف من السلفيين ممثلين فى حزب النور

والاخوان ممثلين فى حزب الحريه والعداله

فى تسويق نفسهم على انهم هما الاسلام

هو اسلوب مرفوض وغير اخلاقي !

فى البدء .. بيتولد الإنسان حُر

آه فعلاً .. قبل ما بيطلّعوله شهاده ميلاد

وقبل ما حد يقول فودانه شويه خراء ديني

بيكون حُر

–

بعد كده بتتولد القيود .. القواعد .. الاخلاقيات ..

وطبعاً بما انها نسبيه .. فطبيعي هيكون في شوية مارقين !

–

المجتمع اللى قانونه بيسجن انسان لانه قال رأيه بحريه

حتى لو شتم السلطه .. يبقى مجتمع اجبن من انه يستحق الحياه

يبقى مجتمع طبيعي يتولد جواه التمرد حتى فـ أبعد القلوب حباً للتمرد

تمرد على الازدواجيه والسخافه والتعنت

–

بحاول افهم مايكل نبيل مسجون ليه

واللى داسو الناس بالدبابات منقدرش نحاكمهم

اللى داسو قبلهم الناس بالمدرعات برده منقدرش نحاكمهم

–

انا شخص متمرد .. مبنكرش

بحلم باليوم اللى اكون فيه حُر .. بشكل مُطلق

عايز اعيش بره حدود القوانين والسلطات الفوقيه

القوانين السخيفه اللى برفضها .. واوقات كتييير بكسرها بكامل ارادتي

–

عندي حلم باني ابني العالم ده

العالم اللى يكون فيه كل انسان حر

العالم اللى هيكون اغلب سكانه من الشباب المتمرد

اللى بقابلهم كل يوم .. ومش قادرين يكسرو القيود

قيود الفكر والقانون والمجتمع والدين والاخلاق والماده ….. والخوف ..

بحلم بعالم الانسانيه السعيده ……..

حُب وسلام …

القوانين التى تجرم البناء فى الاراضي الزراعيه هي قوانين تنتهك حق الملكيه ..

الارض ملك للمواطن يتصرف بها كما يشاء ..

لا يحق للدوله تجريم البناء ..

يحق لها فرض ضريبه تبوير (بما يعادل رسم استصلاح لنفس المساحه)..

او عليها ان تقوم باستبدال الارض الزراعيه بمساحه صالحه للبناء فى مدينه جديده مثلا ..

لكن ما يحدث الان من هدم لبيوت الفلاحين التى بنوها على اراضيهم هو انتهاك لحقهم فى التصرف فى ممتلكاتهم ..

ميدان التحرير .. ميدان الحريه

كان هدف ملايين المصريين والاف المصورين والصحفيين الاجانب

ووجود المتحف المصري وموقعه فقلب القاهره بيخلوه مقصد لناس كتير جداَ

وبصراحه عجبني جدا اقتراح اخت عربيه عالفيس بوك لفكره نخلد بيها ذكرى ثورة الحريه والشباب

الفكره زي ما كتبتها :

لو سمحتم عايزين كل الشباب وكل المسؤولين يهتموا بميدان التحرير لان كل شخص سواء كان عربي او اجنبي كان بيتابع الثورة اصبح حلمه انه يزور ميدان التحرير … انا عن نفسي انا واولادى…اول مكان راح نزوره في القاهرة لما ننزل مصر هيكون ميدان التحرير فياريت تضعوا فيه صور كثيرة للثورة من اول يوم بدأت فيه حتى النهاية وممكن كمان فيلم تسجيلى مختصر للثورة يعيد تشغيله مرة بعد مرة وكل صور الشهداء ونبذة عن حياة كل شهيد.وشكرا

الفكره مش لازم تتنفذ بالشكل ده .. لكن الميدان لازم يحتوي على رمزيه عن الثوره لانه من اهم الاماكن اللى ارتبطت بيه .. الافكار التقليديه هي اننا نعمل تمثال للشهداء ويبقى مزار سنوي تقام فيه احتفالات من تاريخ بدايه الثوره حتى سقوط مبارك .. ياريت كل واحد عنده فكره افضل يقولها وننشرها للتنفيذ ..

وفى النهايه احب اسيبكم مع صوره لميدان التحرير سنه 1981 ..

الفكره دي فى الاصل مشروع قانون للامم المتحده ..
أي والله .. الامم المتحده علطول ..
طبعا انتوا عارفين ان اي قانون للامم المتحده بيبقى الانضمام ليه فى الاول مش الزامي
لكن بالوصول لعدد معين من الدول المنضمه بيبقى الزامي على بقيه اعضاء الامم المتحده ..
ام هند بقى .. ايه حوار المالتي ناسيونال سيتي ده ؟
ده بقى عباره عن مدينه كده .. فيها ضواحي متقسمه بشكل ما ..
كل قسم فى المدينه بيكون تابع لدوله معينه ..
بحيث تقيم فيه منشآت ثقافيه وتجاريه وعلميه والخ
والمعامله فى الارض بالمثل .. يعني هندي الهند الفين متر
ناخد لمصر فى الهند الفين متر .. مفيش بقى المصري بخمسين قرش
والهندي باتنين جنيه .. واسرائيل تاخد ارخص من السعر العالمي والكلام ده !
بيطبق على المدينه دي قانون دولي موحد ..
بتحطه الامم المتحده .. مش قانون الدوله المستضيفه ..
يعني من الاخر كده .. هنظروط الزراويط ..
وبدل ما نسافر تركيا ولا جامعه الدول .. كله هيبقى هناك
ممكن كمان يبقى فيه كافيه هولندي ونحشش ان ببليك
اللى نفسه ياكل صدور كلاب صيني مشوي هيلاقي
واللى عايز وراك ضفادع فرنساوي فيليه ماشي ..
المهم انك هتقدر تعيش كانك فاي دوله تحبها من غير ما تخرج بره مصر
وهوه ده الجلوبلايزيشن ولا بلاش .. فكك بقى من حوار التراث والكلام الفكسان اللى مبيأكلش عيش ده ..
هنشرب العالم كله شيشه .. ونعملهم كشري وطعميه
وهيبقى فى جامعات ومستشفيات
ده بالاضافه لان هيبقى في منح للموظفين
يروحوا يشوفوا اداره المدن بيبقى ازاي
الشرطه المالتي ناشيونال بتشتغل ازاي
كله هيبقى بمواصفات دوليه .. يوتوبيا بقى !

بما ان الشعب ده مانتخ ومتنيل على عينه مش عارف يشتغل ايه
والسؤال اللولبي لاي حد فاشل هوه “اعمل ايه”
وايضا بما اننا شعب مبيتحركش ومبيدورش على حل الا لما يبقى السيف على رقبته
فانا عندي اقتراح .. لو لا قدر الله يعني مسكت الحكم فيوم هبقى اطبقه
اي مواطن يعدي واحد وعشرين سنه وست شهور ولسه مشتغلش
هشده عالسجن تلات شهور .. وبعدين اطلعه ست شهور ..
مشتغلش اشده ست شهور وهكذا ..
ده هيبقى قانون مكافحه البطاله .. زي قانون مكافحه الدعاره كده !
فى خلال الشهور اللى هيتحبس فيهم دول .. مطلوب منه انه يفكر
اه والله .. هوه ده التعذيب ولا بلاش .. يفكر ..
مبيعرفش يفكر .. هنديله شويه حاجات يقراهم كده .. يتعلم منهم ازاي يفكر ..
يعني يطلع يشوفله حد يعلمه ازاي ينسق الورد فى البوكيهات
ازاي يربي خمسين نحلايه عالسطح ..
المهم انه يتعلم ازاي يبتكر المنتج او الخدمه ..
مش عايز يتحبس بقى امري لله .. هاخد منه غرامه واسيبه ..