في طريق العوده من الاسماعيليه الى الزقازيق عبر الطريق الزراعي
قبل مدينه ابو حماد بحوالى 5 كيلومترات ..
الطريق مستواه سيء جدا وغير مضاء فاغلب فقراته
لكن حسب ما رايت انه جاري فصل الاتجاهات وعمل ازدوج للطريق بدايه من الاسماعيليه
وتقريبا في كوبري جاري بناءه قبل ابو حماد ..
الطريقه التى يستخدمها الاغلبيه لحمايه ملفات مواقعهم هي عن طريق حظر جميع الروابط الخارجيه
ورفض الاباتشي لاي ريكوستات قادمه من اي موقع غير الموقع الرئيسي ..
لكن ماذا اذا اردنا السماح للزوار بوضع الروابط فى اكثر من مكان
لكن مع حظر موقع بعينه من استخدام هذه الروابط ؟
اعتقد ان وضع الكود التالي فى ملف htaccess سيؤدي الغرض :
RewriteEngine on
RewriteCond %{HTTP_REFERER} ^http://(www.)?example.com(/)?.*$ [NC]
RewriteRule .*.(rm|ram|mp3)$ http://www.example.com/error.html [R,NC]
قم بتعديل السطر الثاني ووضع رابط الموقع الذي ترغب فى حظره
وفى السطر الثالث قم بوضع الرابط الذي ترغب فى ان يتم تحويل الزائر اليه
وطبعا يمكنك تغيير امتدادات الملفات بين القوسين باضافه امتدادات اخرى او تعديلها حسب احتياجك.
بنظره بسيطه لبنات مصر
نجد ان اغلبهم عندهم تقوس فى الظهر
والظاهره دي بشعه وغبيه جداً !!
ومش عارف اذا كان للمشكله دي مسببات صحيه زي سوء التغذيه مثلاً
لكن لما ببص لحالات معينه من البنات المحيطه
بالاقى انهم بيتغذوا كويس
ويمكن الذكور من نفس الاسره معندهمش نفس الظاهره ..
حاولت ادور على الاسباب اللى ممكن تكون السبب
هل مثلا كره البنت لكونها انثى نتيجه للثقافه الذكوريه اللى بتخليها تتمنى انها متولدتش بنت
من تمييز غبي بينها وبين اخواتها الذكور .. تقييد للحريه .. وتحرشات فى الشوارع .. الخ
ولا مثلا فقدان الثقه فى النفس بسبب الآراء الدينيه الإسلاميه المتشدده المنتشره
اللى بتعادي كل ما هو انثوي .. من اول شعر الانثى لغاية رسمها بدون اثداء فى الكاريكاتير !
والتحريم المكثف لصوتها ومشيتها ورائحتها .. ووصفها بنصف رجل .. وكائن نجس اثناء فتره الحيض ..
الا اني لقيت نفس المشكله عند المسيحيات برضه .. يمكن كل الاديان بتتبع نفس السياسه تجاه الانثى فى بلادنا ..
او يمكن خليط الذكوريه والدين بيؤدوا للنتيجه دي ..
ولا يمكن يكون كبر حجم الثدي عند البنت المصريه مقارنة بنظيرتها الاوروبيه ؟
ولا يمكن كبر الحجم مع النظره الدونيه للذات بيخليها بتحاول تخفي اي شيء بيرمز لانوثتها
انا شايف ان الموضوع معقد ..
بس تعالوا نسأل نفسنا العكس ..
هل مثلا صغر حجم الثدي لدى بنات اوروبا واليابان هوه اللى بيخليهم يشدوا ضهرهم !!
ولا هل ادراك الانثى لجسمها وعدم كرهها ليه نتيجه لعدم وجود التمييز الجنسي بالشكل اللى موجود عندنا هوه السبب ؟
فكروا فى السؤالين دول وانتوا هتفهموا ..
وحرام عليكم كفايه تشويه لبنات بلدنا اكتر من كده ..
لان كل واحد مننا مش هيبقى مبسوط لما يتجوز واحده “مأتبه” .. صحتها نفسيا وجسديا متدمره ..
بقالى فتره قاعد فى اسكندريه
المفروض ان دي فتره استرخاء واستجمام
لكن الواحد مبقاش عارف يستجم خالص
البلد بقت زحمه وبقالها يومين حر ورطوبه
بفكر اسافر الشهر الجاي سلوفينيا اسبوع
وعلشان اقدر اسافر هضطر اصبر لغايه النتيجه لما تطلع
وبما اني من الخارج فلازم ارجع اتسجل تاني انتساب
وبصراحه انا مش عارف هل هيتم تسجيلي مباشره بعد النتيجه
ولا مش هقدر اخد اثبات قيد علشان اقدر اطلع تصريح سفر
كل اللى فات ده بسبب التجنيد الاجباري .. اللى اتمنى نخلص منه قريب ..
ولسه هل هقدر اخد تاشيره سياحه ولا لا .. خمسين حاجه .. الاحسن انسى الموضوع لغايه لما النتيجه تطلع
بمناسبه النتيجه .. نتائج كل الكليات تقريبا على موقع الجامعه السنه دي
والمفترض ان فى رقم لكل طالب بياخده من الكليه .. والنهارده 28 والنتيجه لسه مطلعتش ..
تفتكروا فى كام واحد مش هيعرف يجيب النتيجه من على الموقع ؟
يالا خلى السيبرات تشتغل نتائج كليات كمان .. اشمعنى الثانوي يعني ..
على الله السيرفرات متهيسش بس ..
ايمن نور شغال حملات وتحركات دعائيه من دلوقتي علشان انتخابات 2011
ونازل اسكندريه تاني فحمله طرق ابواب .. وكان راح المنصوره ومدن تانيه من فتره قريبه
كل ده برغم الانقسام جوه حزب الغد .. ومع اني افضل دكتور ايمن عن موسى مصطفى موسى
اللى من وجهة نظري الشخصيه البحته لا يليق برئيس لحزب ليبرالي معارض بقدر ما يليق بعضو حزب وطني موالي للنظام..
وغايظني جدا غياب حزب الجبهه عن الساحه واختفاء دكتور اسامه غزالي
بمناسبه انتخابات 2011 واللى بدأت التوقعات لمرشحيها من دلوقتي
والسيناريوهات المحتمله .. الا ان فكره ائتلاف احزاب المعارضه ونزولهم بمرشح واحد
ووقوفهم كلهم وراه قدام مرشح الوطني اياً كان جمال او مبارك نفسه او اي حد تاني تابع للنظام زي عمر سليمان
ومع تشديد رقابه منظمات المجتمع المدني على الانتخابات .. وزياده المشاركه الجماهيريه فى الانتخابات بنسبه تصل لـ 50% (لو الحياه بقت وردي)
تعتبر دي اكتر فكره مثاليه قابله للتطبيق نسبيا من وجهه نظري ..
لدرجه اني قلت لو مبارك ساب الحكم لوحده وانتقل سلمياً بانتخابات نزيهه لمنافس من المعارضه انا هعلق صورته فى البلكونه عندي ..
اما بقى لو مبارك او جمال مسك الحكم .. فانا هفكر جدياً فى الهجره من البلد دي !!
الاسبوع اللى فات
كنت هفطس من الحر فى الزقزوقه
وقاعد لوحدي فى البيت مقضيها علب تونه لما خلاص فيصت
يوم الاتنين امتحنت فى المرور علشان اطلع رخصه الموتوسيكل
ودي كانت تاني مره اسوق فيها موتوسيكل فحياتي
وطبعا البشمهندس اصطادني من وسط اللى بيمتحنوا كلهم
وقالى لف فى الشارع من غير ما تلمس الارض برجلك
اديت المهمه بنجاح .. بس كنت بنط بالموتوسيكل زي الحصان 
قالى روح اتدرب اسبوع وتعالى .. يالهوي اسبوع ايه !!
كلمت واحد معرفه قالى تعالى بكره وهخليهم يمتحنوك تاني
اتصلت بصديق واحد قريبي عنده موتوسيكل صيني
نزل قابلنى وقعدت نص ساعه اسوق فى شوارع الزقزوقه
تاني يوم طلعت على المرور وواخد الراجل ياعيني بموتوسيكله معايا
دخلت امتحن .. واثق من نفسي بقى .. اتعلمت انزل الموتوسيكل وارفعه وادوره وقشده
لسه بركب على الموتوسيكل لقيته بيقولى اقلع النضاره .. قلعتها قالى خلاص روح وتعالى اتصور بكره
ياعم انت ! مش هتمتحني ولا ايه !!
لقيت الراجل اللى معايا قالى اخلص اطلع بره
المهم رحت اتصورت والحمد لله وخدت الرخصه .. مع العلم معنديش موتوسيكل
المهم قلت خلاص كده النهارده بالليل على اسكندريتي الحبيبه
الساعه 8:10 مساءً بدأت فى التجهيز
8:30 كنت فى التاكسي
8:50 كنت فى المحطه
تذكره اسكندريه مكيف .. الراجل خد العشرين جنيه واداني اتنين جنيه معدن
او تلاته مش فاكر بالظبط
دخلت عالرصيف وقفت وحطيت الشنطه بجواري .. حلوه بجواري دي
عيل غتيت نط عليا .. معرفش طلع منين
والنبي ربع جنيه .. والنبي ربع جنيه .. يارب تتجوزها
اتجوز مين يابني انت !!!!
انا ماشي لوحدي انتوا ايه متبرمجين
حطيت ايدي فجيبي لقيت الجنيهات الفضه .. قلت خد ياعم جنيه بحاله اهه
لقيت الواد بصلى باستعباط كده .. ده جنيه ده !!
كنت هموت من الضحك .. ايه يابني انت كنت فغيبوبه ولا ايه !
ده انت المفروض عارف عملات البلد اكتر مني
وصل القطر وركبت .. دخلت العربيه 1
فين كرسي 51 .. فين فين ..
قوم ايه بقى .. العربيه مفيهاش كرسي 51
احنا هنهرج ولا ايه .. فين يا جدعان الكرسي
الناس تدور معايا مفيش 51 !
طيب نشوف التسلسل بقى .. 48 – 49 .. 40 – 41 .. 52 – 53
قلت مش مشكله مفرقتش 41 من 51 .. احنا فسكك حديد مصر
الراجل اللى جنبي كان محترم .. رائد جيش ومقضيها نوم
وكان في طفل فى الكرسي اللى قدامي هريته اشتغالات طول السكه
وصلت سيدي جابر سالما بحمد الله
فى اعمال بناء فى المحطه والرصيف مقفول فى مناطق كتيره
المهم مصدقت خدت تاكسي .. بشر ياسطى ..
واول ما شفت البحر حسيت بانشكاح عجيب
والحمد لله البلد لسه متزحمتش وكنا بالليل فالتاكسي مخدش وقت طويل
ووصلت اخيرا .. واتعشيت لحمه !!
كانت واحشاني جدا .. الله يحرق التونه وسنينها
صحيت من النوم عالساعه 3 العصر
التكييف جابلى برد محترم ..
بس اهو ارحم من فرن العيش البلدي اللى مصر محطوطه جواه اليومين دول
تليفون من ابن عمي .. هيا بنا نتببسن فى البسين ؟
قلتله هيا بنا ياعم الحج
الساعه 4 الا تلت نزلت من البيت نطيت فاول تاكسي
استاد الشرقيه لو سمحت ..
وصلنا عند المحطه والدنيا مزحومه زحمه سواد
تليفون من ابن عمي بيقولى انزل وخدها مشي لانهم قافلين الطريق
قابلته قدام سفنكس .. واليكم الاخبار بالتفصيل :
تحويل مسار السيارات
سيارات اطفاء واسعاف امام مبنى المحافظه
وسياره كشف المتفرقعات امام قصر الثقافه المقابل لمبنى المحافظه
كردون امني يغلق منطقه مبنى المحافظه من جميع المنافذ
اثناء التصور سمعنا صوت انفجار بسيط لم نستطع تحديد مصدره
لم يتم الافصاح لنا عن اي معلومات بخصوص ما يحدث بالفعل
بعد ذلك انصرفت سيارات الامن المركزي .
اللى غايظني بقى اني وصلت حمام السباحه متأخر
بص قشده قعدتلى ساعه وربع ببسن فى البسين ..
وفى حاجتين ضايقوني النهارده .. اولهم الفيديوهات بتاعه اعدام الخنازير
وريتني قد ايه الاسلوب همجي وقذر .. وبجد اللى بيحصل من الناس دي تشويه لسمعه مصر
ماتيا كنت بتريق عليها ومسميها “Dogs Killer” علشان بتدي الكلاب الكبيره فى السن حقنه تنويم
وبعدين حقنه بتوقف عضله القلب .. من وجهه نظري ده كان قتل فى الاول وفى الاخر مهما دافعت عنه
لكن اللى بيحصل مع الخنازير ده بجد اسلوب مش لاقى كلمات اقدر اوصفه بيها !
تاني حاجه خبر وفاه حفيد مبارك .. صحيح شعرت بالحزن لوفاته فسن 13 سنه
لكن انتشار الخبر فى جميع وكالات الانباء وفى جميع مواقع الانترنت حتى انه انتشر على الاستاتيوس
لتلت اربع الفريندس عندي فى الفيس بوك حسسني ان مبارك هوه اللى مات مش حفيده !
تخيلي نفسك بتاكلي سندوتش بتعشقيه لمده 10 شهور كل يوم ..
طيب تخيلي لمده 10 سنين .. مدى حياتك ؟
محتمل هييجي يوم وتزهقي .. تملي .. تغيري .. تجددي !
الحب برضه بالنسبالى كده ..
هبقى بكدب عليكي لو قلت اني هفضل احبك طول عمري
هبقى كداب لو قلت ان حبي ليكي من اول يوم عرفتك لاخر يوم سبتك كان متساوي فى الكم
لو كنتى محتاجه حد يقنعك باوهام .. مش هيكون انا
انا مقتنع انه ممكن ييجي يوم و الحب ينقلب كره
ممكن ييجي يوم هتكوني فيه ماضي وذكرى
وممكن ميجيش .. لكن مقدرش اوعدك بده ..
ومعتقدش حد كمان ممكن يقدر ..
ومش هصدقك لو قلتى انك هتفضلي تحبيني طول عمرك
مهما حلفتي ومهما وعدتي .. بتكدبي ولو مش حاسه
متضربيش مثل بناس متجوزه وعايشه كويسه
كل واحد فيهم لولا القواعد والقيود كان هرب
كل واحد فيهم لو عنده الحريه كان هيكسر النمط
وانا بعشق حريتي .. اكتر من نفسي ومن حبك !