النهارده سجلت فيديو فى شارع وادي النيل فى الزقازيق
لحمله دعائيه للاخوان المسلمين
بيستخدمو الدين بشكل صريح فى تسويق مرشحيهم لمجلس الشعب
“الاسلام هو الحل .. شرع الله عز وجل”
الاسلوب السخيف من السلفيين ممثلين فى حزب النور
والاخوان ممثلين فى حزب الحريه والعداله
فى تسويق نفسهم على انهم هما الاسلام
هو اسلوب مرفوض وغير اخلاقي !
طلبة جامعه الزقازيق محتشدين امام مبنى ادارة الجامعه
للمطالبة باسقاط دكتور ماهر الدمياطي رئيس الجامعه
من كام يوم وانا متابع ايفنت اسقاط دكتور ماهر الدمياطي عالفيس بوك
ومع العلم باني لم اقابله شخصيا ولا مره خلال سنين دراستي بالجامعه ومحصلش اي موقف مباشر معاه
الا ان اسلوب المعامله اللى بنشوفه من موظفين شئون الطلبه والاداريين وحتى بعض الدكاتره فى وجوده
كان كافي اني اروح واقوله مع الشباب ارحل !
حتى لو كان رحيله مجرد رساله رمزيه .. رساله لكل الموظفين والجهات التعليميه بنوجهها احنا كشباب وكطلبه !
ان خلاص مفيش سكوت .. خلاص مش هنرضى الا بافضل مستوى ..
مطالب الطلاب فى الاساس كان اغلبها بيدور حوالين الانتخابات الطلابيه وحرية التعبير داخل الجامعه
وان كانت هناك مطالبات متعلقه بدعم الكتاب الجامعي وتخفيض المصاريف ..
تعامل الجيش كان سخيف .. ومستفز !
بالرغم من ان الطلبه هتفوا بمجرد ظهور اول قياده عسكريه امام الطلبه
الجيش والشعب ايد واحده !
الا انه حاول اولا انه يمتص غضب الشباب .. وبعد كده بدأ يستعرض مهاراته التفاوضيه مع العمال فمصانع العاشر !!
وبعدين قال عايز اتنين من كل كليه يمثلوكوا وهاخد المطالب منهم واوصلها لقائد الجيش المش عارف كام
واللى هيوصلها للمجلس العسكري .. وعلى ما يردوا .. طبعا يبقى الوضع كما هو عليه !!!!
الناس دي لسه مفهمتش اننا مصدر الشرعيه مش المجلس العسكري !!
ان اللى نقوله هوه اللى يمشي مش كلام المجلس العسكري
ولو وصل الامر لان المجلس العسكري نفسه يمشي هنمشيه !!!
مفيش صوت فوق صوت الشعب .. مفيش صوت فوق صوت ثورتنا !!!
المهم .. انسحبنا وسبنا شويه كده يكمل ضحك عليهم ..
ورحنا عملنا مظاهره تانيه .. وبعد كل اللى بناه دخلنا هديناه تاني وورينا بقى هتثبت مين المرادي 
مفيش ساعه الا ووصل خبر قبول المجلس العسكري لاستقاله الرئيس ..
بس خلاص .. شكراً .. شوفتوا الموضوع سهل ازاي
اقاويل بقى متناثره من هنا وهناك ومقدرش اثبت حاجه منها لاني مطلعتش على اي اثباتات ليها :
1- رئيس الجامعه مرتبه 300 الف جنيه شهري
2- نائب الرئيس مرتبه الشهري 150 الف جنيه شهري
اقاويل تانيه ترددت عن ان ماهر الدمياطي اتقدم باستقالته من يومين للمجلس العسكري
والمجلس رفض الاستقاله !
—
ملاحظات بقى سريعه :
فى ملصقات كتير جدا فى الجامعه بتدعوا لرفض الدوله العلمانيه ولافته كان مكتوب عليها بالنص
“تحذير من المساس بالماده التانيه من الدستور – الشباب السلفي”
انا مش خايف من التحرك السلفي او الاخواني السرطاني فى الجامعه ولا رافضه !
اذا كنا بنطالب بديمقراطيه وحريه فهي للجميع ومن حق كل انسان انه يعبر عن رأيه وفكره
ومن حق الناس انها تختار الفكر الانسب ليها .. وفتصوري .. لاهو الاخواني ولا السلفي
اللى يبص بنظره سريعه كده على الشباب المتظاهر والمتجمع .. مش دول اللى ممكن حتى يبقوا سلفيين او اخوان !!
لكن فى المقابل .. لازم يبقى فى تحرك فوري مكافيء ومنافس .. من كل القوى السياسيه اليساريه
اشتراكيين وليبرالين وديموقراطيين .. ولو تطلب الامر تآلف القوى فى المرحله دي لغايه الانتخابات الجايه
لان فعلا مينفعش الساحه تفضل موجوده قدام التيارات اليمينيه فقط ..
انا بدرس فى كليه الحقوق جامعه الزقازيق
رحت من يومين علشان ادفع المصاريف
انا دايما بتجنب ادفع المصاريف فى اول السنه لان بيكون في زحمه من الطلبه الجدد
لكن يبدوا ان فى فصيل جديد انضم للطلبه الجدد وهما الخريجين !
اول خطوه لازم اعملها اني اروح اخد “اذن دفع” وده بيكون فى شباك شئون الطلب
وشيء ايجابي انهم وزعوا الملفات على موظفين اكتر وشبابيك اكتر
يعني دلوقتي انتساب على شباك وانتظام على شباك .. بتكلم عن سنه رابعه
الله اعلم بالمراحل التانيه ..
غيروا اماكن الشبابيك من التلاجه لورا الكافيتريا قبل تجاره انجلش
لكن مفيش اي تنويه عن الموضوع ده عند شبابيك التلاجه !
المهم .. وصلت بعد شويه لف للشباك .. خدت اذن الدفع ..
ادور بقى عالخزنه .. احم الخزنه كمان اتنقلت وبقى مكانها شباك فيه موظفه
لو سمحت .. الخزنه فين .. شاورتلي على شمالها ..
اكتشفت اني رجعت تاني عند شبابيك شئون الطلبه
رجعت للموظف اللى اداني اذن الدفع .. لو سمحت .. فين الخزنه ..
الموظف رد عالموبايل بتاع سيادته ولا كان فى حد بيكلمه !
المهم .. بعد معاناه وصلت للخزنه .. بعد دوره حوالين مبنى الكليه
المسافه تقريبا بين الشباكين نص كيلو .. لكن مش مهم خلى الطلبه يتمشوا شويه ..
رياضه برضه ..
وصلت اخيرا لشباك الخزنه .. موظف واحد قاعد على شباك
قدامه طابورين طوال من الطلبه مقسم ذكور واناث !
وتنويه وحيد بان مواعيد العمل من 9 الصبح لـ 2 الظهر
بعد اكتر من ساعتين الساعه بقت 1:45 ظهراً
الموظف بيلم شويه اذون دفع والفلوس ملفوفين على بعض
ويقفل الشباك .. واللى الموظف خد منه يستنى الباقى يفوت علينا بكره !
المفترض بعد ما ادفع الفلوس ارجع تاني لشؤون الطلبه اسجل وصل الدفع للمصاريف
استفزاز وبيرقراطيه وبطء او شلل بمعنى اصح !
للاسف الكلام ده بيحصل فى جامعه من اقدم واكبر جامعات مصر
وبيحصل فى بدايه سنه 2011 ..
تطوير خدمه الطلبه فى الجامعه مش مستحيله
ومش هتاخد اكتر من شهور للتحويل من النظام البيروقراطي السخيف الموجود ده
لنظام بيختصر وقت الطالب وبيوفر عليه المجهود وفنفس الوقت يقلل عدد الموظفين
المعادله ببساطه : شباك واحد يقدم اي خدمه لاي طالب فى اي مرحله
ده هيتم عن طريق شبكه كمبيوتر عليها بيانات الطلبه بالكامل
امكانيه الدفع واستخراج اي اوراق خاصه بالطالب من نفس الشباك
لو الموضوع محتاج وقت للمعالجه بيتم اعطاء الطالب ورقه توضح المطلوب منه
اذا كان اوراق من خارج الجامعه او مبالغ ماديه
ويتم تحديد ميعاد لتسليم الطلب للطالب بعد فتره
مع التزام الموظفين بسرعه انهاء ومعالجه الطلبات
مينفعش الطالب يمشي اتنين كيلو فى الجامعه علشان يدفع مصاريف
وزيهم علشان يطلع اثبات قيد .. ويطلع يلف على العميد والوكيل وبقيه الديناصورات
يجيب فتوقيعات واختام اسخف من السخافه !!!
نقطه كمان .. لازم يتم نقل الموظفين اللى اعمارهم فوق الـ 35 الى اي مكان
مفيهوش تقديم خدمات مباشره للطلبه .
الشباب بيكونوا اسرع واكتر رغبه فى تقديم الخدمه بعكس الافنديه اللى رضعوا التطنيش !
احنا مبنشحتش خدمات من الحكومه وموظفينها .. احنا بندفع فلوس وضرايب ..
والموظف ده بيقبض مرتب .. لو مش هيقدم خدمه محترمه يستقيل اشرفله !
هذه تعتبر اول ندوه لى ضمن مسلسل الندوات التى بدانا فى اقامتها فى مختلف محافظات مصر
لتوعيه المجتمع والمهتمين بالتجنيد الاجباري واضراره والبدائل ومناقشتها
كانت هذه الندوه يوم السبت الموافق 17 ابريل
بمقر حزب الجبهه الديمقراطيه بدمنهور – محافظه البحيره
واليوم كان مثمرا جدا من وجهة نظري حيث تفاعل الحاضرون مع الموضوع
مع تقديرهم لخطوره وحساسيه قضية الجيش والامن القومي المصري والحريه الفرديه
بدات الندوه موضحا عيوب التجنيد الاجباري واثاره السلبيه على المجتمع
واتبعني الناشط احمد سعد متحدثا عن الحلول البديله وبعض الاوضاع المترديه داخل المؤسسه العسكريه
ثم تبعه الناشط مايكل نبيل متحدثا عن حق الرفض الواعي
واختتمت الندوه بنقاش مطول مع الحاضرين عن استفساراتهم واقتراحاتهم
آسف لتاخري فى كتابه التدوينه عن الرحله نظرا لانشغالي
اتمنى مكونش نسيت تفاصيل مهمه .. الرحله كانت يوم 14/2/2010
وكالمعتاد على ما قدرت اصحي منسي وعوف كانت الساعه بقت 11 تقريبا
المهم انطلقنا على طريق هريه الجديد متجهين الى صان الحجر
الكاميرا طول الطريق كانت فايد عوف .. فهتلاقوا صور عجيبه
ولولا اني كنت سايق العربيه .. كنتوا هتلاقوا صور اعجب
اول يافطه تحدد المسافه بـ 39 كيلو متر لصان الحجر
مع الاعتذار للواد اللى تحت اليافطه .. محدش يركز معاه .. الله يفضحك يا عوف زي ما فضحته
قررت النهارده اني اروح اعمل بطاقتي الانتخابيه
قمت مصور بطاقه الرقم القومي نسختين احتياطا
وضارب قلم فجيبي احتياطا برضه
وواخد نفسي وطالع على القسم التابع ليه سيادتي
الا وهو فى حالتى قسم ثان الزقازيق ..
وصلت القسم .. العسكري اللى على الباب بيقولى سيب الموبايل
استعبطت وقلتله معييش موبايل ..
مش فاهم انا بانهي مرجعيه قانونيه بيمنعوا الناس من حيازه وسائل اتصال داخل اقسام الشرطه !!
طلعت الدور الاول علوي .. شمال فشمال لقيت اللجنه الانتخابيه فوشي فآخر الطرقه
دخلت اللجنه .. سالني الموظف انت مولود فين بالظبط .. وقام ماسك ملف طويل عريض
خد البطاقه وقعد يدور على اسمي فى الملف .. وحدث ما كان فى الحسبان ..
انا مش متقيد .. طيب ايه العمل ..
هات ورقه طلب قيد فى الجدول من الاستاذ ده (مكتب على اليمين فى نفس الغرفه)
اداني الورقه .. مليت البيانات (الاسم والمهنه وتاريخ الميلاد والعمر والعنوان الخ)
الموظف مضى عليها وقالى روح امضيها من مأمور القسم ..
المأمور فنفس الدور .. هتاخد يمين فشمال فآخر الطرقه هتلاقي مكتبه على يمينك
بس لما رحت لاقيته قافل ومش موجود .. رجعت للافندي تاني
قالي انزل بقى لنائب المأمور تحت .. خدت السلم ونزلت
مكتب نائب المأمور على الشمال وانت نازل من السلم
دخلت وقع على الورقه وطلعت تاني
اديت الطلب وصوره من بطاقه الرقم القومي للموظف
كتب اسمي فملفين كبار .. واحد للمديريه والتاني مش عارف بتاع ايه
واداني رقم وقالى ده الرقم الانتخابي بتاعك .. وتعالى استلم البطاقه فشهر 4/2010
وبكده انتهت التجربه على خير ..
جدير بالذكر انك ممكن متحتاجش تعمل كل ده ويكون اسمك متسجل ويتعملك البطاقه وانت واقف
بس ممكن يتعمل فيك زيي كده .. المهم انك متأنتخش وتروح تعمل البطاقه مادمت اكبر من 18 سنه
وخلى بالك فى انتخابات مجلس الشعب السنه الجايه .. والسنه اللى بعدها الانتخابات الرئاسيه ..
متضيعش الوقت وروح طلع بطاقتك الانتخابيه 
