مدونة احمس

الرهان على نجاح الثوره كان متوقف على رد فعل الناس النهارده

بعد الحمله اللى بداها النظام والقنوات التابعه ليه لاجهاض الثوره بحجج واهيه

زي الحفاظ على الامن وان مبارك وعد ونفذ كل المطالب والاتجاه اللى بيقول ان الناس تصبر الكام شهر الفاضلين دول

للاسف الاجيال العجوزه بترضى باقل من القليل .. مبارك فعلياً مقدمش اي حاجه ..

صوت العقل بيقول ان مبارك استخدم عواطف الشعب وضحك عليه

والاعلام ضلل الناس وكدب عليهم

الحقيقه ان النظام هو اللى اتسبب بكل الفوضى اللى حصلت فى البلد

الحزب الوطني هو سبب كل الخراب اللى حصل فى مصر والنهب والسرقه والدمار

مش المتظاهرين ولا المطالبين بخروج مبارك من السلطه ..

المهم .. الثوره حتى الان نجحت جداً .. حجم الناس اللى فهمت الخدعه ورفضتها

كان مشجع جداً .. فى اتنين مليون مصري فى ميدان التحرير !

دلوقتي مبارك فقد الشرعيه داخلياً .. ودولياً ..

توقعي ان مبارك دلوقتي بيدور على افضل اسلوب يخرج بيه من الحكم

والبلد متدخلش فدوامه من بعده .. مبارك لازم يخرج بشكل يضمن هدوء جميع الاطراف

الجيش والمعارضه وانصار النظام !

مبارك هيحاول يضمن عدم انهيار وضع الجيش

كمان هيحاول يضمن عدم وصول التيارات الدينيه للحكم او نشر فكرها فى المجتمع

وهيحاول بقدر المستطاع يضمن خروج امن لنفسه وللمقربين

مش بس كده .. هيحاول يسيب وراه اللى يضمن ان صورته تفضل محفوظه فى التاريخ

او على الاقل عدم السماح بتشويهها ..

اعتقد كل ده هيتضح من خلال رد فعل سواء بخطاب او اجراء اخر فى اقل من 48 ساعه ..

اجراءات النائب العام الوقائيه ضد الوزراء ورموز النظام السابقين غير كافيه

يجب مد تغطيه التجميد البنكي لجميع الاقارب حتى الدرجه الثالثه وكل من تربطه بهم علاقات مباشره

يتم تجميد حساباتهم ووضع اموالهم تحت الحراسه حتى يتم مراجعة كل ثروتهم ومصادرها !

التجميد لازم تتسع مظلته لتشمل اعضاء الحزب الوطني واعضاء المجالس النيابيه والمحليه ..

مين يقول ان فى رئيس فى الدنيا يقطع وسائل الاتصالات عن شعبه

الا اذا كان ناوي يرتكب فيهم كل انواع الجرائم ضد الانسانيه بدون رقابه دوليه

نظام مبارك قطع :

1- الانترنت.
2- الاتصالات المحموله فى ميدان التحرير واسكندريه والسويس.
3- رسائل SMS و MMS.

فصلها عن الشركات .. عن السياح .. عن كل المصريين !

نظام مبارك صادر تصريح قناه الجزيره .. القناه الوحيده اللى نقلت الصوره بدون تدخل فيها

مش زي المحور ودريم اللى اتخذوا منحنى واضح وصريح للدفاع عن مبارك وتصويره بانه صمام الامان !

ارجوكم محدش يتفرج على القنوات دي ولا على البرامج الحواريه اللى عليها اطلاقاً ..

مبارك .. لم يقدم اي تنازلات .. وبيعاملنا بمنتهى الصلف .. والتكبر والتعالي ..

مبارك يتعامل كانه إله .. مش حتى واحد ورثنا !

الحقيقه الواضحه وضوح الشمس ..

ان الداخليه اول من بدأ باستخدام العنف تجاه المتظاهرين السلميين فى ميدان التحرير ..

فى جريمه خسيسه ووقحه .. الساعه 1 فجراً .. اتفتحت خراطيم المياه وقنابل الغاز على المتظاهرين العزل المدنيين ..

هم نفسهم اللى مبارك بنفسه قال عليهم متظاهرين حضاريين بيطالبوا بمطالب مشروعه ..

تاني يوم ادرك النظام حجم الثوره .. كان رده اعنف واسخف ..

لكن الناس مش هتستحمل الظلم ده كتير .. الناس مش هتاخد على دماغها وتسكت ..

كان لازم رد صريح لكلاب النظام .. ان عنفهم مرفوض .. ومفيش رد عالعنف الا بالعنف !

هرب كل عساكر الداخليه تماماً واختفوا من الشوارع .. حتى عساكر المرور ..

حتى طلبه الكليات العسكريه والشرطه قلعوا زيهم واستخبوا عندنا فى شارع امن الدوله فى الزقازيق ..

فى كل المحافظات الناس اتحركت تحرك جمعي واحد ..

الاهداف كانت الحزب الوطني .. اقسام الشرطه .. مراكز امن الدوله .. مجالس المدن المحليه ..

نار اشتعلت فى كل مكان .. الناس الغلابه دخلت خدت حاجتها اللى كانت مصادراها شرطه المرافق ..

الناس راحت مخازن المرور رجعت موتوسيكلاتها وعربياتها وحتى التكاتك اللى كانت مسحوبه ..

راح اللصوص سرقوا موتوسيكلات المرور واللى كان فاضل هناك فى منظر غريب ..

وخرج مبارك يقول انه راضي تماماً عن اداء الشرطه وابطالها وبيشكرهم !!!

يتبع ..

انا لسه عايش ..

جسدياً آه لسه عايش ..

بس جوايا غضب وثوره .. ثوره ..

يوم 25 بدأنا كلنا ثورتنا .. اللى اتجاهلتها قنوات النفاق الاعلامي ..

والجزيره بدات فى التعامل معاها على استحياء ..

لكني كنت متاكد ان المظاهرات المره دي مش زي اي مظاهرات كانت قبل كده ..

مش هتكون زي مظاهرات سته ابريل اللى فاتت ولا اي مظاهره قدام مجلس الشعب ..

المره دي نازلين للنظام .. بعد ما عرفنا انه هوه بنفسه سبب كل ظلام حوالينا ..

مطالبنا واضحه وصريحه .. اسقاط النظام .. متمثل فى راس السلطه وما دونه ..

مطالبنا ببساطه حريه وعداله اجتماعيه …

دي هتكون مجموعه تدوينات لحاجات شفتها بعيني وتحليلاتي الشخصيه للاحداث ..

الاول وقبل اي شيء .. انا حزين حتى اعماقي ..

دماء بشر كتير سالت على ارضك يا مصر .. ومش هتكون آخر دماء

ناس اعرفها وناس معرفهاش .. دمهم طاهر واحلامهم كانت كبيره ..

دفعوها تمن حريتك يا وطن ..

ساعود !

يوم الجمعه الموافق 30 ابريل 2010
كان تاريخ افتتاح فرع الجمعيه الوطنيه للتغيير بالزقازيق بمقر حزب الجبهه الديمقراطيه
بحضور شخصيات معارضه شهيره كالسيد جورج اسحاق
وحضور الدكتور احمد صلاح امين الجبهه بالشرقيه والدكتور سعيد كامل
الذي افتتح الندوه بترحيب الحزب باستضافه الجمعيه واعضائها ودعم الحزب لدعوى التعديلات الدستوريه
التى جددها الدكتور البرادعي والجمعيه الوطنيه للتغيير .

وانا ارى ان دور الجبهه فى استضافه الجمعيه فى العديد من المحافظات هو دور يحسب له كحزب سياسي مصري
فى حين انسحاب الاحزاب الاخرى بل ووقوفها فى موقف معادي للجمعيه ..
ولكن دوما ما كنت ارى من النشطاء رفضهم للاحزاب واتهامهم لها بانها احزاب هشه وصوريه
ولا دور لها فى الواقع السياسي .. وانا ارفض هذا الاتهام ..
هناك احزاب سياسيه جاده .. تحاول احياء الحراك السياسي الميت فى المجتمع المصري
بالرغم من القيود الاقتصاديه الممثله فى الموارد الماليه المحدوده ..
والقيود القانونيه الاخرى التى تستوجب احترامها للحفاظ على الشرعيه القانونيه !
لم يقف احد ليطالب مثلا بخصم التبرعات للاحزاب السياسيه من الضرائب ليتم تمويل الاحزاب من رجال الاعمال
كبقيه الجميعات الاهليه المصريه .. والامثله اخرى كثيره ..

نعود لموضوعنا .. هذه بعض الصور التى التقطتها للندوه التى تحدث فيها
العديد من ممثلي الجمعيه فى المحافظات الاخرى .. واحد المرحلين من الكويت بسبب نشاط الجمعيه هناك
اترككم مع الصور ..

Read More

طيب انا هبدا بمقدمه معبره شويه ..
عصور الاستبداد البوليسي التى مرت على مصر منذ انقلاب عسكر  1952
ادت الى قتل روح المشاركه المجتمعيه واحساس المواطنين بدورهم فى الحراك السياسي
نتيجه لانتشار عمليات الاعتقال والحبس بدون المرور بالسلطه القضائيه او اجراء محاكمات عسكريه صوريه
وتطبيق قوانين مثل قانون الطواريء بمواده المنتهكه للحريات والحقوق التى يحفظها الدستور ..
ممكن حد يختلف معايا فى جزئيه او اتنين من المقدمه لكن النتيجه اللى كل القوى السياسيه فمصر متفقه عليها
هيا ان فعلا الشعب بقى ميت سياسيا والعمل المجتمعي والمشاركه المدنيه بقت فى ادنى مستوياتها ..
العجيب بقى .. بعد الثوره السياسيه اللى بدات من 2005 مع ظهور حركة كفايه وشباب سته ابريل ودعوتهم للاعتصام السلمي
وحركات المظاهرات والاعتصامات الفئويه “كما يسميها منسي” ان حاجز الخوف بدأ فى الزوال
الناس بدأت تعبر عن اللى جواها من تاني وتنزل للشارع .. وكان اخرها البرادعي ونقاش رجل الشارع العادي بكثافه عنه
العجيب اني كنت فمنتدى مصري للسيارات … واذا بي افاجأ بالقرار العجيب بمنع الكلام فى السياسه فى المنتدى
لان البلاد تمر بظروف حرجه ولا نريد ان يتسبب المنتدى فى اذى لاحد اعضائه او ادارته .. ياخي إحترم نفسك !!
طبعا هوه موقعه وهوه حر .. لكن موقف ضد التيار .. بيعمق الصوره الاولانيه ..
المجد للحريه !

استعجبت كثيراً من موقف عدد لا يستهان به من المصريين الرافضين لقرار حظر المآذن فى سويسرا
فكبدايه .. لا يحق لنا لوم شعب على حق تقرير مصيره .. مادام لم يخالف القوانين والاعراف الدوليه
النقطه الثانيه استفزني جدا مقارنه البعض للمسلمين فى سويسرا بالمسيحيين فى مصر
هي مقارنه حمقاء فعلاً .. فبغض النظر عن وجوب حصول المسيحيين فى مصر على تصريح من رئيس الجمهوريه
قبل بناء او ترميم اي كنيسه .. الا ان هؤلاء الرافضين نظروا للموضوع من نظرتهم الاسلاميه
تعالوا ننظر للموضوع بنظرة مجتمع مسيحي علماني فى اغلبه (لا يعني على الاطلاق بان كل مسيحي هو علماني)..
موقف الدين الاسلامي من منظور المسيحيه هو دين غير معترف به
فالمسيحيه لا تعترف الا بما يسبقها من الاديان كاليهوديه
تقريبا كموقف الدين الاسلامي من الدين البهائي فهو لا يعترف به ايضاً ..
اذا فمقارنه المسيحيه فى مصر بالاسلام فى سويسرا غير منطقي ادبياً
لكن قانونيا .. سويسرا تعترف بحق اقامه دور العباده لاي دين ايا كان ..
وهو ما لا تتمتع به الاقليات الدينيه كالبهائيه فى مصر ..
ثالثا .. نحن بحاجه الى جلد الذات اولاً ..
فالغوغاء من الشعب المصري هم من قاموا بتهجير البهائيين فى الشورانيه وحرق منازلهم
ولم نسمع صوتاً للمتشدقين بحق المسلمين فى بناء المآذن فى سويسرا يحرك ساكناً ..
والغوغاء من المصريين ايضاً هم من احرقوا من ايام قليله محلات المسيحيين فى فرشوط وسط تكتم اعلامي غير عقلاني
انا فى النهايه مع حق الاعتقاد وحق الدعوه للدين .. وان تكون هذه الحقوق مكفوله دولياً ..
ولكن .. يا من تطالبون بحق المسلمين فى العباده والدعوه للاسلام .. هل تقبلون التبشير بالمسيحيه فى دولكم ؟
هل تقبلون الدعوه للبهائيه او البوذيه او حتى الإلحاد على الاراضي المصريه ؟
اذا لا داعي للتحامل على الشعب السويسري .. فرهاب المختلفين موجود لدى كل الشعوب ..