قال توريث قال ..
يا جماعه بجد جالي صداع من شوية الرعاع الحاقدين دول
هوه يا معارض انت وهوه علشان البابا بتاع سيادتكم مش رئيس جمهوريه
تقوموا تحقدوا على ولاد الرؤساء !!
بطلوا الحقد الطبقي ده بقى .. وكل شويه توريث توريث ..
هوه السيد الرئيس (طول الله عمره) هيتنازل عن الحكم
فى الوصيه لا مؤاخذه يعني
ابداً ابداً مش هيحصل الكلام ده ..
انتخابات نزيهه .. مش استفتاء كمان ..
والراجل هيكسب .. لان الناس بتحبه ..
مشوفتوش فيديوهات التأييد والحب من دلوقتي عاليوتيوب ولا ايه !!
ده حتى الحكومه الالكترونيه بتحبه ..
حد فيكوا شاف دومين على .eg علطول غير بتاع حمله شارك ؟؟؟
وبعدين هو اي واحد سياسي عايزين تحرموه من حلم الرئاسه
علشان والده كان رئيس او مازال رئيس ؟!
طيب ماهو امريكا اهيه اللى عمالين تقولوا على حريتها وديموكراتيتها مسك فيها بوش الاب وبوش الابن ..
ايه يعني لما يبقى عندنا مبارك الاب ومبارك الابن زي امريكا كده واهو نبقى مشتركين معاهم فى حاجه من نفسنا ..
ولا هوه يعني علشان كان فى كام رئيس فى النص بينهم يعني ..
ادعوا معايا ..
ربنا يخليلنا الزعيم القائد .. وابن الزعيم القائد .. آمييين
ربنا يطول فعمرنا لما نشوف ابن الزعيم القائد زعيم قائد … آمييين
انت مبتدعيش ليه ياجدع .. انت كافر ولا ايه ؟؟!!!