مدونة احمس

انا بدرس فى كليه الحقوق جامعه الزقازيق
رحت من يومين علشان ادفع المصاريف
انا دايما بتجنب ادفع المصاريف فى اول السنه لان بيكون في زحمه من الطلبه الجدد
لكن يبدوا ان فى فصيل جديد انضم للطلبه الجدد وهما الخريجين !
اول خطوه لازم اعملها اني اروح اخد “اذن دفع” وده بيكون فى شباك شئون الطلب
وشيء ايجابي انهم وزعوا الملفات على موظفين اكتر وشبابيك اكتر
يعني دلوقتي انتساب على شباك وانتظام على شباك .. بتكلم عن سنه رابعه
الله اعلم بالمراحل التانيه ..
غيروا اماكن الشبابيك من التلاجه لورا الكافيتريا قبل تجاره انجلش
لكن مفيش اي تنويه عن الموضوع ده عند شبابيك التلاجه !
المهم .. وصلت بعد شويه لف للشباك .. خدت اذن الدفع ..
ادور بقى عالخزنه .. احم الخزنه كمان اتنقلت وبقى مكانها شباك فيه موظفه
لو سمحت .. الخزنه فين .. شاورتلي على شمالها ..
اكتشفت اني رجعت تاني عند شبابيك شئون الطلبه
رجعت للموظف اللى اداني اذن الدفع .. لو سمحت .. فين الخزنه ..
الموظف رد عالموبايل بتاع سيادته ولا كان فى حد بيكلمه !
المهم .. بعد معاناه وصلت للخزنه .. بعد دوره حوالين مبنى الكليه
المسافه تقريبا بين الشباكين نص كيلو .. لكن مش مهم خلى الطلبه يتمشوا شويه ..
رياضه برضه ..
وصلت اخيرا لشباك الخزنه .. موظف واحد قاعد على شباك
قدامه طابورين طوال من الطلبه مقسم ذكور واناث !
وتنويه وحيد بان مواعيد العمل من 9 الصبح لـ 2 الظهر
بعد اكتر من ساعتين الساعه بقت 1:45 ظهراً
الموظف بيلم شويه اذون دفع والفلوس ملفوفين على بعض
ويقفل الشباك .. واللى الموظف خد منه يستنى الباقى يفوت علينا بكره !
المفترض بعد ما ادفع الفلوس ارجع تاني لشؤون الطلبه اسجل وصل الدفع للمصاريف
استفزاز وبيرقراطيه وبطء او شلل بمعنى اصح !
للاسف الكلام ده بيحصل فى جامعه من اقدم واكبر جامعات مصر
وبيحصل فى بدايه سنه 2011 ..
تطوير خدمه الطلبه فى الجامعه مش مستحيله
ومش هتاخد اكتر من شهور للتحويل من النظام البيروقراطي السخيف الموجود ده
لنظام بيختصر وقت الطالب وبيوفر عليه المجهود وفنفس الوقت يقلل عدد الموظفين
المعادله ببساطه : شباك واحد يقدم اي خدمه لاي طالب فى اي مرحله
ده هيتم عن طريق شبكه كمبيوتر عليها بيانات الطلبه بالكامل
امكانيه الدفع واستخراج اي اوراق خاصه بالطالب من نفس الشباك
لو الموضوع محتاج وقت للمعالجه بيتم اعطاء الطالب ورقه توضح المطلوب منه
اذا كان اوراق من خارج الجامعه او مبالغ ماديه
ويتم تحديد ميعاد لتسليم الطلب للطالب بعد فتره
مع التزام الموظفين بسرعه انهاء ومعالجه الطلبات
مينفعش الطالب يمشي اتنين كيلو فى الجامعه علشان يدفع مصاريف
وزيهم علشان يطلع اثبات قيد .. ويطلع يلف على العميد والوكيل وبقيه الديناصورات
يجيب فتوقيعات واختام اسخف من السخافه !!!
نقطه كمان .. لازم يتم نقل الموظفين اللى اعمارهم فوق الـ 35 الى اي مكان
مفيهوش تقديم خدمات مباشره للطلبه .
الشباب بيكونوا اسرع واكتر رغبه فى تقديم الخدمه بعكس الافنديه اللى رضعوا التطنيش !
احنا مبنشحتش خدمات من الحكومه وموظفينها .. احنا بندفع فلوس وضرايب ..
والموظف ده بيقبض مرتب .. لو مش هيقدم خدمه محترمه يستقيل اشرفله !

في قسم : نشاطات

الكلمات الدليليه :التعليم.المصاريف.بيروقراطيه.جامعه الزقازيق.حقوق.خدمات حكوميه

الفكره دي فى الاصل مشروع قانون للامم المتحده ..
أي والله .. الامم المتحده علطول ..
طبعا انتوا عارفين ان اي قانون للامم المتحده بيبقى الانضمام ليه فى الاول مش الزامي
لكن بالوصول لعدد معين من الدول المنضمه بيبقى الزامي على بقيه اعضاء الامم المتحده ..
ام هند بقى .. ايه حوار المالتي ناسيونال سيتي ده ؟
ده بقى عباره عن مدينه كده .. فيها ضواحي متقسمه بشكل ما ..
كل قسم فى المدينه بيكون تابع لدوله معينه ..
بحيث تقيم فيه منشآت ثقافيه وتجاريه وعلميه والخ
والمعامله فى الارض بالمثل .. يعني هندي الهند الفين متر
ناخد لمصر فى الهند الفين متر .. مفيش بقى المصري بخمسين قرش
والهندي باتنين جنيه .. واسرائيل تاخد ارخص من السعر العالمي والكلام ده !
بيطبق على المدينه دي قانون دولي موحد ..
بتحطه الامم المتحده .. مش قانون الدوله المستضيفه ..
يعني من الاخر كده .. هنظروط الزراويط ..
وبدل ما نسافر تركيا ولا جامعه الدول .. كله هيبقى هناك
ممكن كمان يبقى فيه كافيه هولندي ونحشش ان ببليك
اللى نفسه ياكل صدور كلاب صيني مشوي هيلاقي
واللى عايز وراك ضفادع فرنساوي فيليه ماشي ..
المهم انك هتقدر تعيش كانك فاي دوله تحبها من غير ما تخرج بره مصر
وهوه ده الجلوبلايزيشن ولا بلاش .. فكك بقى من حوار التراث والكلام الفكسان اللى مبيأكلش عيش ده ..
هنشرب العالم كله شيشه .. ونعملهم كشري وطعميه
وهيبقى فى جامعات ومستشفيات
ده بالاضافه لان هيبقى في منح للموظفين
يروحوا يشوفوا اداره المدن بيبقى ازاي
الشرطه المالتي ناشيونال بتشتغل ازاي
كله هيبقى بمواصفات دوليه .. يوتوبيا بقى !

في قسم : افكار وتوجهات

الكلمات الدليليه :امم متحده.عولمه.مدينه دوليه

بما ان الشعب ده مانتخ ومتنيل على عينه مش عارف يشتغل ايه
والسؤال اللولبي لاي حد فاشل هوه “اعمل ايه”
وايضا بما اننا شعب مبيتحركش ومبيدورش على حل الا لما يبقى السيف على رقبته
فانا عندي اقتراح .. لو لا قدر الله يعني مسكت الحكم فيوم هبقى اطبقه
اي مواطن يعدي واحد وعشرين سنه وست شهور ولسه مشتغلش
هشده عالسجن تلات شهور .. وبعدين اطلعه ست شهور ..
مشتغلش اشده ست شهور وهكذا ..
ده هيبقى قانون مكافحه البطاله .. زي قانون مكافحه الدعاره كده !
فى خلال الشهور اللى هيتحبس فيهم دول .. مطلوب منه انه يفكر
اه والله .. هوه ده التعذيب ولا بلاش .. يفكر ..
مبيعرفش يفكر .. هنديله شويه حاجات يقراهم كده .. يتعلم منهم ازاي يفكر ..
يعني يطلع يشوفله حد يعلمه ازاي ينسق الورد فى البوكيهات
ازاي يربي خمسين نحلايه عالسطح ..
المهم انه يتعلم ازاي يبتكر المنتج او الخدمه ..
مش عايز يتحبس بقى امري لله .. هاخد منه غرامه واسيبه ..

في قسم : افكار وتوجهات

الكلمات الدليليه :شباب.عاطل.عمل.فكره

يوم الجمعه الموافق 30 ابريل 2010
كان تاريخ افتتاح فرع الجمعيه الوطنيه للتغيير بالزقازيق بمقر حزب الجبهه الديمقراطيه
بحضور شخصيات معارضه شهيره كالسيد جورج اسحاق
وحضور الدكتور احمد صلاح امين الجبهه بالشرقيه والدكتور سعيد كامل
الذي افتتح الندوه بترحيب الحزب باستضافه الجمعيه واعضائها ودعم الحزب لدعوى التعديلات الدستوريه
التى جددها الدكتور البرادعي والجمعيه الوطنيه للتغيير .

وانا ارى ان دور الجبهه فى استضافه الجمعيه فى العديد من المحافظات هو دور يحسب له كحزب سياسي مصري
فى حين انسحاب الاحزاب الاخرى بل ووقوفها فى موقف معادي للجمعيه ..
ولكن دوما ما كنت ارى من النشطاء رفضهم للاحزاب واتهامهم لها بانها احزاب هشه وصوريه
ولا دور لها فى الواقع السياسي .. وانا ارفض هذا الاتهام ..
هناك احزاب سياسيه جاده .. تحاول احياء الحراك السياسي الميت فى المجتمع المصري
بالرغم من القيود الاقتصاديه الممثله فى الموارد الماليه المحدوده ..
والقيود القانونيه الاخرى التى تستوجب احترامها للحفاظ على الشرعيه القانونيه !
لم يقف احد ليطالب مثلا بخصم التبرعات للاحزاب السياسيه من الضرائب ليتم تمويل الاحزاب من رجال الاعمال
كبقيه الجميعات الاهليه المصريه .. والامثله اخرى كثيره ..

نعود لموضوعنا .. هذه بعض الصور التى التقطتها للندوه التى تحدث فيها
العديد من ممثلي الجمعيه فى المحافظات الاخرى .. واحد المرحلين من الكويت بسبب نشاط الجمعيه هناك
اترككم مع الصور ..

اقرأ المزيد

في قسم : سياسه و مجتمع

الكلمات الدليليه :البرادعي.الجمعيه.الزقازيق.الوطنيه.حزب الجبهه.للتغيير

هذه تعتبر اول ندوه لى ضمن مسلسل الندوات التى بدانا فى اقامتها فى مختلف محافظات مصر
لتوعيه المجتمع والمهتمين بالتجنيد الاجباري واضراره والبدائل ومناقشتها
كانت هذه الندوه يوم السبت الموافق 17 ابريل
بمقر حزب الجبهه الديمقراطيه بدمنهور – محافظه البحيره

واليوم كان مثمرا جدا من وجهة نظري حيث تفاعل الحاضرون مع الموضوع
مع تقديرهم لخطوره وحساسيه قضية الجيش والامن القومي المصري والحريه الفرديه
بدات الندوه موضحا عيوب التجنيد الاجباري واثاره السلبيه على المجتمع
واتبعني الناشط احمد سعد متحدثا عن الحلول البديله وبعض الاوضاع المترديه داخل المؤسسه العسكريه
ثم تبعه الناشط مايكل نبيل متحدثا عن حق الرفض الواعي
واختتمت الندوه بنقاش مطول مع الحاضرين عن استفساراتهم واقتراحاتهم

اقرأ المزيد

في قسم : نشاطات

الكلمات الدليليه :البحيره.التجنيد الاجباري.حزب الجبهه الديمقراطيه.دمنهور

طيب انا هبدا بمقدمه معبره شويه ..
عصور الاستبداد البوليسي التى مرت على مصر منذ انقلاب عسكر  1952
ادت الى قتل روح المشاركه المجتمعيه واحساس المواطنين بدورهم فى الحراك السياسي
نتيجه لانتشار عمليات الاعتقال والحبس بدون المرور بالسلطه القضائيه او اجراء محاكمات عسكريه صوريه
وتطبيق قوانين مثل قانون الطواريء بمواده المنتهكه للحريات والحقوق التى يحفظها الدستور ..
ممكن حد يختلف معايا فى جزئيه او اتنين من المقدمه لكن النتيجه اللى كل القوى السياسيه فمصر متفقه عليها
هيا ان فعلا الشعب بقى ميت سياسيا والعمل المجتمعي والمشاركه المدنيه بقت فى ادنى مستوياتها ..
العجيب بقى .. بعد الثوره السياسيه اللى بدات من 2005 مع ظهور حركة كفايه وشباب سته ابريل ودعوتهم للاعتصام السلمي
وحركات المظاهرات والاعتصامات الفئويه “كما يسميها منسي” ان حاجز الخوف بدأ فى الزوال
الناس بدأت تعبر عن اللى جواها من تاني وتنزل للشارع .. وكان اخرها البرادعي ونقاش رجل الشارع العادي بكثافه عنه
العجيب اني كنت فمنتدى مصري للسيارات … واذا بي افاجأ بالقرار العجيب بمنع الكلام فى السياسه فى المنتدى
لان البلاد تمر بظروف حرجه ولا نريد ان يتسبب المنتدى فى اذى لاحد اعضائه او ادارته .. ياخي إحترم نفسك !!
طبعا هوه موقعه وهوه حر .. لكن موقف ضد التيار .. بيعمق الصوره الاولانيه ..
المجد للحريه !

في قسم : سياسه و مجتمع

الكلمات الدليليه :المجتمع.تعبير.حريه.حق.سياسه.فوبيا

آسف لتاخري فى كتابه التدوينه عن الرحله نظرا لانشغالي
اتمنى مكونش نسيت تفاصيل مهمه .. الرحله كانت يوم 14/2/2010
وكالمعتاد على ما قدرت اصحي منسي وعوف كانت الساعه بقت 11 تقريبا
المهم انطلقنا على طريق هريه الجديد متجهين الى صان الحجر

الكاميرا طول الطريق كانت فايد عوف .. فهتلاقوا صور عجيبه
ولولا اني كنت سايق العربيه .. كنتوا هتلاقوا صور اعجب

اول يافطه تحدد المسافه بـ 39 كيلو متر لصان الحجر
مع الاعتذار للواد اللى تحت اليافطه .. محدش يركز معاه .. الله يفضحك يا عوف زي ما فضحته

اقرأ المزيد

في قسم : نشاطات

الكلمات الدليليه :اثار.سياحه.صان الحجر.مصر